Prokurorët amerikanë thonë se një YouTuber, i cili me dashje rrëzoi një aeroplan për të rritur shikime, do të deklarohet fajtor për pengimin e një hetimi federal duke pastruar vendin e rrëzimit. Trevor Jacob, 29 vjeç, postoi videon e rrëzimit të avionit në YouTube në dhjetor 2021, duke lënë të kuptohet se ishte një aksident. Ai ka mbi 2.9 milionë shikime deri më sot.
Në një marrëveshje për pranimin e fajësisë, ai tha se e filmoi videon si pjesë e një marrëveshjeje sponsorizimi produkti. Ai mund të përballet me 20 vjet burg. Piloti 29-vjeçar dhe parashutisti ka rënë dakord të deklarohet fajtor për një akuzë të krimit të shkatërrimit dhe fshehjes me qëllimin për të penguar një hetim federal, tha në një deklaratë të enjten departamenti i drejtësisë amerikane.
Në nëntor 2021, Jacob u largua nga një aeroport i Santa Barbara, Kaliforni me një fluturim të vetëm me kamera të montuara në aeroplanin e tij. Së bashku me kamerat, Jacob mori me vete një parashutë, si dhe një shkop selfie. Ai “nuk kishte ndërmend të arrinte destinacionin e tij, por në vend të kësaj planifikoi të tërhiqej nga avioni i tij gjatë fluturimit dhe të filmonte me video veten duke u hedhur me parashutë në tokë dhe aeroplanin e tij teksa u përplas”, tha Zyra e Prokurorit të SHBA për Qarkun Qendror të Kalifornisë.
Avioni u rrëzua në Pyllin Kombëtar Los Padres 35 minuta pas ngritjes. Ai shkoi në vendngjarje dhe gjeti pamjet. Disa shikues të YouTube ishin skeptikë për rrëzimin, duke vënë në dukje se Jacob tashmë kishte veshur një parashutë dhe nuk bëri asnjë përpjekje për të ulur avionin në mënyrë të sigurt.
Ai e raportoi përplasjen në Bordin Kombëtar të Sigurisë së Transportit, i cili tha se ai ishte përgjegjës për ruajtjen e rrënojave. Sipas marrëveshjes për pranimin e fajësisë, Trevor më vonë pretendoi se nuk e dinte vendndodhjen e ngjarjes. Por në fakt ai e dinte dhe u kthye me helikopter dhe siguroi dhe hoqi rrënojat, të cilat më vonë i shkatërroi, thuhet në deklaratë. Jacob pritet të bëjë paraqitjen e tij të parë në gjykatë në javët e ardhshme. Patenta e pilotit iu hoq vitin e kaluar, dhe nga ana tjetër avokati i Trevor Jacob nuk i është përgjigjur kërkesës së mediave për të dhënë ndonjë koment.
