Cristiano Ronaldo, futbollisti i njohur për arritjet e tij të jashtëzakonshme në fushë dhe jashtë saj, ka arritur një tjetër rekord mbresëlënës. Ai është personi i parë në botë që ka arritur mbi një miliard ndjekës në të gjitha platformat e mediave sociale.
Ronaldo ka 638 milionë ndjekës në Instagram, 60.6 milionë abonentë në YouTube, 113 milionë ndjekës në X (ish-Twitter), 170 milionë ndjekës në Facebook, 9.4 milionë ndjekës në Kuaishou dhe 7.5 milionë në Weibo, dy platforma kineze. Ai është personi më i ndjekur në Instagram dhe ka hapur së fundmi kanalin e tij në YouTube, ‘UR.Cristiano’, ku arriti 50 milionë abonentë në më pak se një javë. Për të thyer rekordin e një milion abonentëve në YouTube, Ronaldo i duhej vetëm 90 minuta.
Në një postim në X, Ronaldo shprehu emocionet e tij për këtë arritje të madhe:
Kemi bërë historinë, 1 miliard ndjekës! Ky është më shumë se një numër – është një testament i pasionit, dëshirës dhe dashurisë sonë të përbashkët për lojën dhe përtej saj. Nga rrugët e Madeira-s deri te arenat më të mëdha në botë, unë kam luajtur gjithmonë për familjen time dhe për ju, dhe tani 1 miliard prej nesh qëndrojmë së bashku.
Ju keni qenë me mua në çdo hap të rrugës sime, në të gjitha nivelet e larta dhe të ulëta. Ky është udhëtimi ynë dhe së bashku, ne kemi treguar se nuk ka kufij për atë që mund të arrijmë. Faleminderit që besuat tek unë, për mbështetjen tuaj dhe që jeni pjesë e jetës sime. Më e mira nuk ka ardhur ende, dhe ne do të vazhdojmë të fitojmë dhe të bëjmë histori së bashku.
