U deshën 16 vjet për ta ndërtuar dhe besohet se i ka kushtuar jetën qindra njerëzve. Rrugët lejojnë kalimin e njerëvze e mallrave përmes territoreve të gjera të tokës, dhe nganjëherë mes terreneve më të vështira. Ndoshta një nga më ambiciozet prej tyre është autostrada Karakoram, e cila lidh Kinën me Pakistanin. Rrjeti britanik Express shkruan:
Më shumë se 1000 km e gjatë, ajo ka kërkuar 16 vjet për t’u ndërtuar, nga viti 1962 deri në 1978 dhe nganjëherë krahasohet me “mrekullitë e botës”.
Ajo është gjithashtu nga rrugët më të larta në botë pasi kalon nëpër malet Karakoram. Në një prej segmenteve ajo arrin lartësinë mbi 5000 metra mbi nivelin e detit, dhe prej klimës së ashpër ajo mbyllet në dimër prej motit të keq. Ndërsa në sezonin e shirave mund të ketë rrëshkitje dheu, çka ka bërë që shumë punonjës të saj të kenë humbur jetën gjatë punimeve, si nga pala kineze ashtu dhe pakistaneze.
Sot rruga tërheq mjaft turistë aventurierë që interesohen për kalimin madhështor i vendosur në një korridor ‘të rrezikshëm’ si nga ana gjeologjike, ashtu dhe gjeopolitike, shkruan Express. Ajo kalon pranë vendit ku takohen pllakat tektonike indiane dhe euraziatike, si dhe është një çështje delikate politike pasi i afrohet krahinës së Kashmir, për të cilën konfiktohen shpesh India e Pakistani.
Emri i saj, Karakoram, vjen nga vargmalet me të njëjtin emër, shtëpia e përqendrimit më të madh të majave më të larta se 8,000 metra në tokë, duke përfshirë K2, malin më të lartë në botë pas Malit Everest. Një pjesë e madhe e autostradës konsiderohet se “ndjek” rrugën e lashtë të Mëndafshit dhe për këtë arsye ajo ka një vlerë të madhe historike.
