E ftuar në emisionin “Live From Tirana” ka qenë artistja e njohur, Loré, emri i vërtetë i të cilës është Lorela Karoshi. Ajo ka publikuar këngën e saj më të re që mban titullin “Të du”, e cila ka hyrë këtë javë në klasifikimin e “The Top List”, madje duke u pozicionuar në vend të pestë. Lore na ka treguar se si u krijua kjo këngë, por dhe shumë detaje të tjera të pazbuluara më parë…
Si lindi “Të du”?
E kemi nisur këtë cikël të ri me një koncept të qartë. E nisa me “Po largohem”, që ishte hallka e parë e këtij cikli gri me balada pop. Janë vazhdimësi e njëra-tjetrës. Flet për braktisjen e një epoke tënden për t’u hedhur tek diçka e re, më e bukur. U largova nga diçka në jetën time, nga vetja ime e vjetër për të hyrë në këtë kapitull të ri. “Të du” flet për të dashur veten në këtë kapitull të ri. Ne jemi projekti ynë më i madh i jetës sonë. Për këtë flet, por mund të merret edhe si një dedikim dashurie.
Sa e vështirë është të jesh unike në tregun muzikor shqiptar?
Është e vështirë sepse edhe të jesh komercial do njëfarë mjeshtërie, që kënga të dalë në sipërfaqe e të shkojë te veshi i njerëzve. Nuk është vetëm çështje e të mos bërit kompomis. Do vijë dhe ajo që të afrohesh më shumë me atë që dëgjojnë njerëzit sot, por me prekjen time dhe kjo është e veçanta, ajo që të identifikon.
Kur do të vijë kënga e re?
Për 2-3 javë, ky është afati që i kemi lënë secilës këngë. Vazhdon të jetë pjesë e këtij cikli, për të mësuar më shumë historinë dhe atë që do të vijë më mbrapa. Sepse siç e thashë, do të lidhen me njëra-tjetrën.
Cilin nga artistët shqiptarë por dhe të huaj do të zgjidhje për një bashkëpunim?
Mendoj se do të shkoja mirë me një reper. Do të zgjidhja Killua që e kam shumë xhan, ose Lyrical Son. Nga të huajt kam shumë në mendje, kohët e fundit jam fiksuar me Stormzy. Por dhe Kendrick, apo Kanye që është një gjeni.
Nëse edhe juve ju pëlqen kënga “Të du”, ju mund të vazhdoni ta votoni atë për të qenë sa më gjatë pjesë e “The Top List”.