Të gjithë me siguri e konsumoni Aperol Spritz. Kjo pije kaq e dashur për ju sidomos stinën e verës përgatitet për rreth tre minuta. Është aq popullore sa ministrja italiane Eugenia Roccella e konsideroi përgjegjëse për një krizë të popullsisë duke thënë se çiftet e reja tani zgjedhin midis “pirjes së spritz dhe lindjes së fëmijëve”. Megjithatë, spritz-i origjinal nuk ishte portokalli. Historia e tij shkon prapa në shekullin e 19-të kur Austria pushtoi Venedikun në 1797 dhe e sundoi atë për dekada.
Austriakët nuk kishin shije për verën e rëndë veneciane, Malvasia dhe importuan traditën e tyre të “Spritzen”, duke shtuar një spërkatje me ujë të gazuar në një gotë verë të bardhë. Ideja për të përdorur prosecco, në vend të verës dhe për ta përzier me një liker të hidhur erdhi shumë më vonë, kur, sipas Giuseppe Zanon, banakieri dhe bashkëpronar i kafenesë historike Al Mercà nga Ura e Rialtos, venecianët vendosën që kjo pije ishte shumë e lehtë dhe filluan të shtonin Aperol, Select, Campari ose Cynar të renditura nga më e ëmbla deri tek më e hidhura.
Aperol u shpik në qytetin e afërt të Padovës në vitin 1919 nga vëllezërit Luigi dhe Silvio Barbieri pas shtatë vitesh eksperimentesh, duke përpunuar disa përbërës. Ajo u reklamua për herë të parë në vitet 1920 për konsumatorët që dëshironin të qëndronin në formë për shkak të nivelit të ulët të alkoolit (11%) dhe për gratë në vitet 1930 me sloganin, “Signora! Aperol ju mban të dobët”. Nga vitet ’80, ai ishte i lirë dhe i vlerësuar nga klientët në çdo bar lokal në rajonin e Venetos.
