Një e treta e fëmijëve në Lindjen e Mesme dhe Afrikën e Veriut janë të kequshqyer. Këtë ka paralajmëruar UNICEF, duke dhënë alarmin mbi krizën e përkeqësuar mes konfliktit dhe ndryshimeve klimatike. “Të paktën 77 milionë fëmijë, ose një e treta, në Lindjen e Mesme dhe Afrikën e Veriut vuajnë nga një formë e kequshqyerjes”-tha Fondi i Kombeve të Bashkuara për Fëmijët në një deklaratë për shtyp.
Sipas UNICEF-it, 55 milionë fëmijë në 20 vende të rajonit janë mbipeshë ose obezë dhe 24 milionë fëmijë të tjerë vuajnë nga nënushqyerja, veçanërisht ngecja në rritje, humbja dhe dobësia. “Përkeqësimi i krizës së kequshqyerjes në rajon është për shkak të natyrës dhe mënyrës në të cilën ushqehen fëmijët, mungesës së përdorimit të ushqimeve me vlera proteinike, ujë të pijshëm, kujdes mjekësor dhe shërbime të tjera bazë, si dhe rritjes së lartë të ushqimeve të lira dhe të pashëndetshme, në kripë, sheqer dhe yndyrë”-shton agjencia.
Këtyre i shtohet një mjedis konflikti i përhershëm, paqëndrueshmëri politike, goditje klimatike dhe rritje të çmimeve të ushqimeve, të cilat, së bashku, privojnë fëmijët nga e drejta e tyre për një dietë ushqyese dhe kufizojnë aksesin humanitar për popullatat e cënueshme. Ndërkaq, sjellim në vëmendje se gati 52 000 raste të kolerës janë raportuar nga 17 vende të botës në muajin korrik, 15% më shumë në muaj, raportoi Organizata Botërore e Shëndetësisë.
Përveç rasteve të kontaminimit u raportuan gjithashtu edhe 223 vdekje, 34% më shumë në muaj. Infeksioni bakterial në zorrën e hollë përhapet përmes ushqimit dhe ujit të kontaminuar, shpesh nga feçet e njeriut. Nëse nuk trajtohet, mund të shkaktojë vdekje brenda disa orësh, veçanërisht te fëmijët. Rajoni i Mesdheut Lindor regjistroi shifrat më të larta, rreth 43 500. Rajoni përfshin 21 vende nga Pakistani në Afganistan dhe Irani në Marok dhe përfshin Rripin e Gazës.
