Një asteroid pritet t’i afrohet Tokës më 13 prill të vitit 2029. Agjencia Evropiane e Hapësirës ka njoftuar se anija e saj e re kozmike Ramses mund të shoqërojë asteroidin Apophis para dhe pas kalimit të tij të sigurt, ndonëse mjaft afër, të Tokës, sipas CNN. Shkëmbi hapësinor, me përmasa 375 metra, do t’i afrohet planetit tonë më shumë se sa satelitët në orbitën e tij dhe 10 herë më afër se Hëna.
Apophis do t’i afrohet Tokës aq shumë sa do të jetë i dukshëm me sy të lirë për rreth 2 miliardë njerëz që jetojnë në pjesën më të madhe të Evropës, Afrikës dhe pjesëve të Azisë. Për të mbërritur në Apophis në shkurt 2029, Ramses duhet të nisë në prill të vitit 2028. Sipas agjencisë:
Puna përgatitore tashmë ka filluar në mision duke përdorur burimet ekzistuese për të përmbushur këtë qëllim.
Por vendimi përfundimtar për angazhimin në mision do të merret në takimin e Këshillit Ministror të ESA-s në nëntor të vitit 2025. E zbuluar për herë të parë në vitin 2004, Apophis është emëruar për perëndinë egjiptiane të kaosit dhe errësirës dhe besohet se ka formën e një kikiriku.
Fillimisht, astronomët ishin të shqetësuar se shkëmbi hapësinor mund të udhëtojë drejt Tokës në vitin 2029 dhe 2068, por vëzhgimet e mëvonshme kanë përjashtuar çdo rrezik që Apophis të përbënte një kërcënim për Tokën për shekullin e ardhshëm, sipas Qendrës së NASA-s për Studimet e Objekteve Afër Tokës.
Nga ana tjetër, shpërthimi termonuklear i një ylli mund të bëhet i dukshëm së shpejti me sy të lirë. T Coronae Borealis i njohur gjithashtu si T Cor Bor, T CrB dhe ylli Blaze do të jetë po aq i ndritshëm sa Ylli i Veriut, në atë që mund të quhet ngjarje që ndodh një herë në jetë. T CrB bëhet i dukshëm çdo 80 vjet pas një shpërthimi termonuklear në sipërfaqen e një ylli që njihet si xhuxhi i bardhë, rreth 3000 vjet dritë larg. Xhuxhi thith hidrogjen nga një gjigant i kuq fqinj dhe kjo shkakton një grumbullim presioni dhe nxehtësie që përfundimisht shkakton shpërthimin.
