Pas shpalljes së Vjosës Park Kombëtar në Pranverë të këtij viti, grupi i ekspertëve lokalë dhe ndërkombëtarë po punojnë për fazën e dytë të parkut në bashkëpunim me Ministrinë e Mjedisit dhe Turizmit, kompaninë e veshjeve për aktivitetet në natyrë Patagonia, IUCN (Bashkimi Ndërkombëtar për Ruajtjen e Natyrës) si dhe Agjencinë Kombëtare të Zonave të Mbrojtura.
Në një nisje të re frymëzuese për të siguruar ruajtjen dhe zhvillimin e qëndrueshëm të kësaj zone natyrore të pasur, ka filluar faza e dytë e projektimit të Vjosës Park Kombëtar me konsultimet publike për të përfshirë komunitetin dhe palët e interesit që ndikojnë dhe ndikohen në zonën përreth Vjosës.
Të gjitha takimet do të mbahen nga ora 09.00 në mëngjes deri më 14.00 në drekë në Përmet, Gjirokastër, Tepelenë dhe Vlorë duke nisur nga data 6 deri në datë 9 shtator 2023.
Konsultimet publike janë një hap i rëndësishëm drejt një procesi të drejtë gjithpërfshirës në marrjen e vendimeve të duhura për mjedisin përreth Vjosës dhe komunitetin.
Rëndësia e konsultimeve publike është e dyfishtë. Së pari, ato sigurojnë që zëri i komunitetit dhe palëve të interesuara të dëgjohet dhe të merret parasysh në hartimin e planit përfundimtar. Ky proces promovon transparencë dhe përgjegjshmëri në mënyrën se si projekti do të zhvillohet. Së dyti, konsultimet publike ndihmojnë në identifikimin e çështjeve dhe shqetësimeve të ndryshme që mund të lindin gjatë implementimit të projektit, duke lejuar për përmirësime në fazën fillestare të planifikimit.
Çfarë nënkuptohet me “mbrojtje” dhe çfarë ndodh më tej
Parku Kombëtar u krijua për të mbrojtur lumin dhe degët e tij. Aspektet skenike të luginës janë rezultat i proceseve të pandërprera natyrore dhe jetesës harmonike të njerëzve që banojnë e punojnë këtu. Lugina ofron argëtime përmes sporteve natyrore si ecja, ngarja e biçikletave dhe vizitat turistike, në kombinim me edukimin, që përputhet me objektivin e mbrojtjes së jetës natyrore të parkut. Turizmi i qëndrueshëm dhe bujqësia janë dy aktivitetet kryesore që do të sigurojnë mirëqënien e komuniteteve në basenin e gjerë të Vjosës.
Në bashkëpunim me banorët vendas, qeverinë shqiptare, bizneset dhe ekspertë të konservimit natyror do të hartohet një plan i integruar menaxhimi që mbron bukuritë natyrore të Vjosës dhe ndërton një komunitet vendas të begatë.
Takimet me palët e interesuara
Për të ruajtur harmoninë mes lumit të mbrojtur, ekonomisë vendase dhe përdorimit të luginës, do të zhvillohet një plan i integruar menaxhimi. Askush nuk e njeh më mirë vendin dhe zonën sesa, njerëzit që jetojnë e punojnë përgjatë luginës së Vjosës. Këndvështrimet e palëve të interesit janë themelore për suksesin dhe mbarëvajtjen e Parkut Kombëtar të Lumit të Egër Vjosa.
Përgjatë muajve në vijim, do të mbahen disa takime për t’u siguruar që nevojat e palëve të interesuara të përfshihen në mënyrën si do të operojë parku.
Nisja e konsultimeve publike për fazën e dytë të Vjosës Park Kombëtar është një hap pozitiv drejt krijimit të një projekti të qëndrueshëm dhe të përfshirë për komunitetin lokal dhe mjedisin. Është e rëndësishme që ky proces të vazhdojë, të jetë transparent dhe i hapur, të dëgjohen dhe të merren seriozisht komentet dhe sugjerimet e të gjithë palëve të interesuara.
Me një mjedis të pasur natyror dhe potencial turistik të jashtëzakonshëm, Vjosa Park Kombëtar ka mundësinë të jetë një model pozitiv për të tjera projekte të ngjashme në të ardhmen, duke ndihmuar në ruajtjen e trashëgimisë së çmuar natyrore dhe krijimin e mundësive të qëndrueshme për komunitetet e lokalizuara në zonën përreth Vjosës.
