Prokuroria ka nisur hetimet në lidhje me inspektorin e policisë, që po hetonte vrasje ne Egli Progës në Pogradec.
Sipas Prokurorisë së Korçës, inspektori ka shpërdoruar detyrën, për shkak se pasi ndodhi ngjarja, nuk mori asnjë masë për të dokumentuar apo bërë prezent shkakun e vdekjes. Raportohet se ai e ka cilësua si vdekje aksidentale, duke pretenduar se viktima ishte i pirë dhe ishte rrëzuar. Madje, kur kushëriri i Progës i ka thënë që ai kishte shenja dhune në trup, ai e ka larguar duke i thënë “ik ore ti”.
Njoftimi i Prokurorisë:
Më datë 10.08.2024, rreth orës 19:00, është marrë njoftim se në afërsi të vendit të quajtur “Axhensia”, tek rreth-rrotullimi, lagjja nr.2 në Pogradec, u gjet një shtetas i shtrirë pa ndjenja. Pas mbërritjes së punonjësve të policisë lokale u identifikua si shtetasi E.P. i cili u transportua në spital pa shenja jete.
Lidhur me ngjarjen janë pyetur shtetasit V.Sh., A.B., A.Sh., R.B., L.G., A.M., dhe D.M.
Nga deklarimi i shtetasit A.B., rezultoi se në momentin që ka qenë në spital ku ka shoqëruar viktimën, ka dëgjuar duke folur në telefon Inspektorin, A.L., i cili ka komunikuar faktin se një person është i pirë dhe është rrëzuar.
A.B. i ka thënë se kushëriri i tij (viktima) ishte goditur, por inspektori i ka thënë ‘ore ik andej’.
Veprimet hetimore paraprake të cituara më lart, të kryera në funksion të një hetimi të plotë dhe të gjithanshëm të kësaj çështjeje penale, kanë krijuar një dyshim të arsyeshëm të bazuar në prova, se nga ana e shtetasit A.L., janë konsumuar elementë të veprës penale ‘Shpërdorimi i detyrës’ parashikuar nga nenit 248 i Kodit Penal, për shkak se ky shtetas me detyrë Inspektor, Trupë shërbimi, Patrullë e Përgjithshme, në shkelje të detyrave të tij funksionale, nuk ka ndërmarrë asnjë masë për të dokumentuar apo bërë prezent shkakun e vdekjes së viktimës edhe pse ky shkak i është bërë prezent nga dëshmitari okular i ngjarjes shtetasi A.B.
Gjithashtu rezulton e provuar, se prokurorit të gatshëm i është raportuar paraprakisht fakti se nga Salla Operative është marrë njoftim se një person i dehur i moshës rreth 37 vjeç është rrëzuar dhe për pasojë ka ndërruar jetë në Spitalin Rajonal të Pogradecit.
Në këto rrethana, shtetasi i sipërpërmendur u mor në përgjegjësi penale për veprën penale të dyshuar të kryer prej tij, për shkak se si pasojë e veprimeve të tij nuk është bërë i mundur dokumentimi real i ngjarjes së ndodhur.
