Burimet njerëzore janë kthyer në një problem të madh për zhvillimin e qëndrueshëm, por tashmë po vuan edhe sektori publik që në të kaluarën kishte konkurrencë të fortë për vendet e punës. Të dhënat e kësaj jave nga Portali Mësues për Shqipërinë, tregojnë se në të gjithë vendin ka 222 vende të paplotësuara për mësues matematike dhe mësues të Gjuhës e Letërsisë. Mungesa ka thuajse në të gjithë bashkitë e vendit, po në ato të veriut situata është emergjente.
Problematika më e madhe është në bashkitë e Kukësit e Dibrës, aty ku janë edhe mungesat më të mëdha, të cilat nuk po plotësohen, sidomos për mësues matematike.
Në Kukës, aktualisht ka 29 vende bosh për mësues matematike dhe në Dibër, 23 të tillë. E treta vjen bashkia e Tiranës ku mungojnë 11 mësues matematike në arsimin parauniversitar. Këto vende ishin të lira se paku që në fillim të muajit mars, kur Monitor bëri verifikimin e fundit.
Në profilin e Gjuhës dhe Letërsisë Shqipe mungojnë 64 mësues, ku me mungesat më të mëdha është bashkia e Durrësit me 9 vende vakante, Kukësi me 7 dhe Puka me 6.
Gjuha dhe Matematika janë lëndët bazë në arsimin parauniveristar, por siç shihet, mangësitë më të mëdha janë për mësues matematike. Mungesat më të mëdha rajonale i ka Veriu. Gjimnazet e njësive administrative në Kukës e Dibër ushtrojnë aktivitet mësimor në një pjesë të konsiderushme pa mësues Matametike të profilit.
Emigracioni i jashtëm dhe lëvizjet e brendshme i kanë krijuar këto mungesa. Të rinjtë nga qarqet që përfundojnë shkollën për Mësuesi, nuk preferojnë të rikthehen në vendlindje. Nga ana tjetër, profesioni i mësuesit nuk është i mirëpaguar që të tërheqë punonjës nga rajonet që kanë tepricë në mësues Matematike.
Por, situata për mësues Matematike duket se është problematike në të gjithë vendin, pasi edhe Bashkinë e Tiranës tashmë janë 11 vende vakante, të cilët nuk po mund të plotësohen prej muajsh.
Mësuesit e Matematikës që kishin mbaruar studimet në vitet 1990 kishin cilësi të lartë, pasi në kohën e komunizmit, gjimnazistët me arritjet më të larta studionin në Shkencat e Natyrës, teksa pas viteve 2000 ka ndodhur e kundërta. Nxënësit e gjimnazit me mesatare të dobët vazhduan studimet për vendet e mbetura bosh në degën e Matematikës.
Gjithashtu, kjo degë rrezikon të mbyllet plotësisht pasi vitin e kaluar numri i nxënëseve që ndoqën studimet ishte i ulët. Në vitin e akademik 2023-2024, degët që lidhen më Mësuesinë, si Fizika, Historia, Gjuhë-Letërsia, Arkeologjia, Biologjia, Filozofia kishin mbi 70-80% të kuotave të lira në raundin e parë, teksa dega e Matematikës në Fakultetin e Shkencave është në rrezik mbylljeje nga mungesa e studentëve.
Në këto kushte, një gjimnazist me mesatare 5 që studion për Matematikë nuk garanton cilësi në mësimdhënie në të ardhmen. Aktualisht, lënda e Matematikës në shumicën e shkollave jepet nga brezi që ka mbaruar para viteve 1990. Me daljen e këtij brezi në pension, Matematika rrezikon të mbetet pa mësues ose në rastin më të mirë do të jepet nga maturantët me rezultatet më të dobëta./Monitor
