Stadiumi i Mynihut që pret ndeshjet e Euro 2024 pritet që të ndriçohet me ngjyrat e ylberit në datat 22 dhe 23 qershor, për të festuar fundjavën e Krenarisë së qytetit gjerman. Lajmin e konfirmuan organizatorët e turneut.
Nuk ka ndeshje në Mynih në këto dy ditë, ku kryeqyteti bavarez po zhvillon ngjarje për të festuar komunitetet lezbike, homoseksuale, biseksuale, trans dhe më gjerë queer (LGBT+).
Ngjyra e mbulesës së jashtme të stadiumit ishte një çështje kryesore e mosmarrëveshjes tre vjet më parë gjatë Kampionatit Europian 2021 të mbajtur në të gjithë kontinentin. Qeveria e futbollit europian, UEFA hodhi poshtë një kërkesë të qytetit për të ndriçuar arenën me ngjyrat e ylberit për ndeshjen e tretë të grupit kundër Hungarisë.
Sfondi i kërkesës ishte një protestë kundër një ligji të miratuar në Hungari, për të cilin kritikët thanë se kufizonte të drejtat e të rinjve për të marrë informacion mbi homoseksualitetin dhe transeksualitetin. UEFA e arsyetoi vendimin duke thënë se protestat politike nuk lejoheshin në aktivitetet e saj.
Mynihu do të presë gjashtë ndeshje në Europianin e këtij viti në Gjermani, duke përfshirë takimin e hapjes të kësaj të premteje, 14 qershor mes ekipit gjerman dhe atij skocez. Kjo do të pasohet nga tri ndeshje të tjera në grup në datat 17, 20 e 25 qershor, si dhe një ndeshje e 16-të (më 2 korrik) e një gjysmëfinale (më 9 korrik).
Gjermania do të luajë sërish me Hungarinë në Shtutgart, më 19 qershor.
Kombëtarja Shqiptare vijon me përgatitjet për ndeshjen e parë të grupit në Euro 2024 ndaj Italisë, me kuqezinjtë që kanë zhvilluar vetëm një seancë stërvitore në kampin bazë në Kaiserau. Skuadra ka punuar për më shumë se 90 minuta mes palestrës dhe fushës, me grupin që ka qenë i plotë dhe deri tani nuk ka probleme fizike për asnjë lojtar.
Departamenti i Komunikimit në FSHF bën të ditur se sot, Kombëtarja do të zhvillojë një seancë stërvitore që do të nisë në ora 12:00 e do të jetë e hapur për mediat 15 minutat e para.
Gjithashtu, sot do të ketë një konferencë për median me një nga futbollistët kuqezi, duke filluar nga ora 14:30 e që do të transmetohet në kanalin e FSHF-së në platformën Youtube. Të gjithë gazetarët e interesuar për të ndjekur konferencën mund hyjnë në linkun e posaçëm për konferencën.
