Një gjykatë në Moskë ka dënuar shtetasin amerikan Joseph Tater me 15 ditë burg nën akuzat për akte huliganizmi pas arrestimit të tij. Sipas Komitetit Hetimor të Rusisë, Tater u arrestua pasi dyshohej se sulmoi një oficer policie dhe refuzoi të paraqesë kartën e identitetit. “I dyshuari refuzoi të paraqesë kartën e identitetit dhe më pas ushtroi dhunë kundër një punonjësi të zbatimit të ligjit”-tha komiteti në një deklaratë.
Arrestimi vjen mes shqetësimeve të vazhdueshme për statusin e shtetasve të tjerë perëndimorë në burgjet ruse. Arrestimi i Tater vjen pas një shkëmbimi të burgosurve të profilit të lartë në fillim të këtij muaji midis Rusisë dhe disa vendeve perëndimore, i cili përfshinte lirimin e gazetarëve amerikanë Evan Gershkovich dhe Alsu Kurmasheva, si dhe ish-marinsin amerikan Paul Whelan.
Një numër shtetasish amerikanë dhe nga vende të tjera perëndimore ndodhen në burgjet ruse nën akuza të ndryshme. Departamenti Amerikan i Shtetit po e ndjek nga afër situatën. “Jemi në dijeni të njoftimeve për arrestimin e një shtetasi tjetër amerikan në Rusi dhe po punojmë për të siguruar sa më shumë të dhëna që mundemi, përfshirë qasjen konsullore”-tha zëvendës zëdhënësi i Departamentit të Shtetit, Vedant Patel. “Nuk kam të dhëna specifike për shkak të shqetësimeve të privatësisë, por po punojmë që të marrim sa më shumë informacion”.
