Modelja Lottie Moss, motra e supermodeles Kate Moss, përfundoi në spital pasi mori një mbidozë të Ozempic, një ilaç i destinuar për diabetikët që shumë njerëz e përdorin për të humbur peshë. Lottie e mori Ozempic-un nga një shoqe dhe tani thotë se më përpara do të “preferonte të vdiste” sesa ta përdorte përsëri. Pas dy javësh përdorimi të një doze të madhe të Ozempic, Lottie pësoi një krizë për shkak të dehidratimit të rëndë. Pas ekzaminimeve nga mjekët, modelja mësoi se doza e Ozempic-ut që ajo e injektonte në këmbë duhet të përshkruhej për dikë që peshon të paktën 100 kilogramë, ndërsa ajo peshonte rreth 50 kilogramë.
Pak muaj më parë nuk isha e kënaqur me peshën time, një shoqe ma siguroi këtë ilaç. Doza që po merrja ishte për njerëzit që peshonin 100 kilogramë ose më shumë, ndërsa unë peshoja rreth 50 kilogramë. Këto janë gjëra që do të kisha dashur të dija para se ta merrja. Por e mora. E injektoja në këmbë dhe ishte vendimi më i keq që kam marrë. Ky është një paralajmërim për të gjithë. Ju lutem, nëse mendoni ta merrni, mos e bëni, nuk ia vlen.
View this post on Instagram
Modelja përshkroi efektet anësore të rënda që pësoi, të vjella, ndryshime në ngjyrën e fytyrës, humbje drastike të peshës. Lottie tha se para se të fillonte të përdorte Ozempic, peshonte rreth 60 kilogramë, por ra në 57 pas dozës së parë dhe më pas të paktën 53 kilogramë.
Preferoja më përpara të vdisja sesa ta përdorja përsëri. Më bëri të ndihesha kaq e sëmurë. E përdora për dy javë. Merrja një injeksion në javë dhe kurrë në jetë nuk jam ndier më e sëmurë. Kisha të vjella, ishte e tmerrshme. Kam qenë në shtrat për dy ditë dhe pesha më humbi. Kjo nuk është humbje e shëndetshme e peshës. Më bëri të ndihesha aq keq sa i thashë shoqes sime që nuk mund të pija as ujë apo të haja, asgjë. Duhej të shkoja në spital.
Pasi shkoi në spital, Lottie pësoi një krizë që, sipas saj, ishte gjëja më e frikshme që i ka ndodhur ndonjëherë. Shoqja e saj e mbante për këmbët ndërsa ajo përpëlitej në dyshemenë e spitalit. Ajo thotë se infermierja ishte e tronditur kur mësoi dozën e madhe që po merrte dhe sa shumë kishte humbur peshë në pak kohë.
Ishte e tmerrshme. Nuk e dija çfarë po ndodhte. Fytyra ime po përpëlitej, trupi im ishte i tendosur, duart… Ishte e çuditshme. Duart m’u shtrënguan dhe nuk mund t’i lëvizja, dukej sikur do të më thyhej krahu. Shpresoj që përvoja ime të jetë një mësim për disa njerëz, nuk ia vlen. Ky ilaç është për diabetikët, nuk është për humbjen e peshës. E kuptoj që të gjithë personazhet e famshëm janë aktualisht duke e përdorur dhe është kaq e vështirë ta shohësh.
Lottie filloi të merrej me modelim që në moshën 16 vjeçare. Ajo thotë se industria e modës është toksike dhe se dikur e tallnin sepse nuk kishte një bel të hollë. Për këtë arsye, ndonjëherë nuk e merrnin nëpër sfilata.
