Ndotja mikroplastike është zbuluar për herë të parë në gjakun e njeriut, ku shkencëtarët kanë zbuluar grimcat e vogla në pothuajse 80% të njerëzve të testuar. Zbulimi tregon se grimcat mund të udhëtojnë nëpër trup dhe mund të vendosen në organe. Ende nuk dihet ndikimi në shëndet. Studiuesit janë të shqetësuar pasi mikroplastika shkakton dëme në qelizat njerëzore në laborator dhe grimcat e ndotjes së ajrit tashmë dihet se hyjnë në trup dhe shkaktojnë miliona vdekje të hershme në vit.
Sasi të mëdha mbetjesh plastike derdhen në mjedis dhe mikroplastika tani kontaminon të gjithë planetin, nga maja e malit Everest e deri te oqeanet më të thella. Shkencëtarët analizuan mostrat e gjakut nga 22 donatorë anonimë, të gjithë të rritur të shëndetshëm dhe gjetën grimca plastike. Gjysma e mostrave përmbanin plastikë PET, e cila përdoret zakonisht në shishet e pijeve, ndërsa një e treta përmbante polistiren, që përdoret për paketimin e ushqimeve dhe produkteve të tjera. Një e katërta e mostrave të gjakut përmbanin polietileni, nga i cili bëhen qese plastike.
Prof.Dick Vethaak, një ekotoksikolog në Vrije Universiteit Amsterdam në Holandë tha se:
Studimi ynë është treguesi i parë që kemi grimca polimer në gjakun tonë dhe është një rezultat i rëndësishëm. Por ne duhet të zgjerojmë kërkimin dhe të rrisim madhësitë e mostrës, numrin e polimerëve të vlerësuar, etj. Studime të mëtejshme nga një numër grupesh tashmë janë duke u zhvilluar.
Një studim i fundit zbuloi se mikroplastika mund të ngjitet në membranat e jashtme të qelizave të kuqe të gjakut dhe mund të kufizojë aftësinë e tyre për të transportuar oksigjen. Grimcat janë gjetur gjithashtu në placentën e grave shtatzëna dhe te minjtë shtatzënë ato kalojnë me shpejtësi përmes mushkërive në zemra, tru dhe organe të tjera të fetusit.
