Shkencëtarët thanë se kanë zbuluar koralin më të madh në botë afër Ishujve Solomon në Paqësor, duke thënë se ai është “plot jetë dhe me ngjyra”. Korali i zbuluar është aq i madh saqë hulumtuesit, që po bënin kërkime në ujërat e kristalta të arkipelagut të Solomonit, fillimisht menduan se hasën në një anije të fundosur. “Kur ne menduam se nuk ka mbetur asgjë tjetër për t’u zbuluar në planetin Tokë, ne gjetëm një koral masiv të bërë nga gati 1 miliard polipe të vogla, që pulson me jetë dhe ngjyra”-tha ekologu detar, Enriv Sala.
Struktura besohet se është rritur për rreth 300 vjet dhe është krijuar nga një “rrjet i ndërlikuar” i polipeve të vogla koralesh. Ky koral dallon nga një koral shkëmbor, i cili përbëhet nga koloni të dallueshme koralesh. I gjerë 34 metra dhe 32 metra i gjatë, ky “mega-koral” është tri herë më i madh sesa korali më i madh i zbuluar paraprakisht në Samoan amerikane, i quajtur “Big Momma”.
“Përderisa ‘Big Momma’ duket si një lugë e madhe me akullore e vendosur poshtë një shkëmbi, ky koral i sapozbuluar është sikurse akullorja kur fillon të shkrihet dhe shtrihet përgjatë shtratit të detit”-tha shkencëtarja kryesore e ekipit që e zbuloi koralin, Molly Timmers. Korali është më i gjatë sesa një balenë blu dhe besohet se është “aq kolosal” sa mund “të shihet nga hapësira”. Korali u zbulua në cepin juglindor të Ishujve Solomon, në një zonë që njihet si Tri Motrat. Ai u pikas nga një ekip i National Geographic, që po kryente një ekspeditë shkencore në rajon.
“Përderisa shkëmbinjtë e cekët që gjenden afër u degraduan për shkak të deteve të ngrohta, të gjesh një koral kaq të shëndetshëm në ujëra pak më të thella është një fije shprese”-tha shkencëtari i koraleve, Eric Brown. Ujërat e pastër të Ishujve Solomon njihen prej kohësh për diversitetin e tyre ekologjik. “Ka shumë ende për të mësuar për pasuritë e jetës detare dhe të ekosistemit të oqeanit, por ky zbulim hap dyert për dije”-tha zyrtari kryesor i Ishujve Solomon, Collin Beck.
Duhen kërkime të tjera për të kuptuar më mirë biodiversitetin tonë të pasur dhe të planetit tonë.
Ndërkaq, koralet në mbarë botën po zbardhen dhe madje po vdesin pasi nxehtësia rekord në fundin e oqeanit ka shkaktuar efekte shkatërruese. Rasti i fundit regjistron ngjarjen e katërt globale të zbardhjes masive të koraleve, sipas Administratës Kombëtare Oqeanike dhe Atmosferike të SHBA (NOAA). Zbardhja e tyre ndodh kur koralet stresohen dhe zbardhen sepse uji në të cilin jetojnë është shumë i nxehtë. Korali mbështet jetën në oqean, peshkimin dhe krijon triliona dollarë të ardhura çdo vit. Të dhënat e nxehtësisë së oqeanit kanë rënë për muaj të tërë, por kjo është prova e parë globale se si ky episod po ndikon në jetën detare.
