Me 41 të shtëna të njëkohshme me top, në Angli, Skoci, Uells e Irlandën e Veriut, si dhe në territoret përtej detit, sot në mesditë me orën lokale, Mbretëria e Bashkuar i dha lamtumirën Princit Philip. Bashkëshorti i Mbretëreshës Elizabeta e Dytë ndërroi jetë dje në moshën 99-vjeçare, dy muaj para se të mbushte 100-vjeç. Të shtënat me top ishin homazh i Ministrisë Britanike të Mbrojtjes në nderim të roleve që Duka e Edinburgh-ut ka luajtur në forcat e armatosura mbretërore, edhe si pjesëtar në Luftën e Dytë Botërore.
Për shkak të kufizimeve nga pandemia koronavirus, ceremonia u zhvillua pa publik të pranishëm por u transmetua direkt në ekranet e stacioneve televizive. Të shtëna me top në nderim të Princit Philip pati nga kështjellat e Cardiff-it, Edinburgh-ut, Hillsborough-ut në Belfast, Kullës së Londrës, kazermës londineze Woolwich Barracks, si dhe nga Gjibraltari, bazat detare të Devonport-it e Portsmouth-it e nga disa anije luftarake si Diamond apo Montrose.
Në llogarinë në Twitter të familjes mbretërore britanike, citohet një pasazh i Mbretëreshës Elizabetë referuar bashkëshortit me të cilin qëndroi e martuar prej 74 vitesh. Eshtë fjala për një pjesë nga një fjalim i monarkes në vitin 1997.
Ka qenë forca ime dhe mbeti e tillë për gjithë këto vite. Unë, e gjithë familja e tij, ky vend e shumë vende të tjera i detyrohemi një borxh shumë më të madh nga sa ai mund të presë ose që ne mund të dimë.
“He has, quite simply, been my strength and stay all these years, and I, and his whole family, and this and many other countries, owe him a debt greater than he would ever claim, or we shall ever know.”
-Her Majesty The Queen, 1997. pic.twitter.com/wbSldSavNA
— The Royal Family (@RoyalFamily) April 10, 2021
