Kompania amerikane e ushqimit të shpejtë “McDonald’s” po mbyll 850 bizneset e saj në Rusi, deri në një njoftim tjëtër, në përgjigje të pushtimit rus të Ukrainës. Kompania ndërkaq njoftoi se:
Të gjitha dyqanet në Rusi do të mbyllen përkohësisht, por pagat e rreth 62,000 punonjësve vendas do të vazhdojnë të paguhen.
CEO i “McDonald’s”, Chris Kempczinski në një e-mail drejtuar punonjësve, i cili u publikua në internet tha se:
Pavarësisht se “McDonald’s” u ka shërbyer miliona klientëve rusë çdo ditë për më shumë se 30 vjet, kompania nuk mund të injorojë vuajtjet e panevojshme njerëzore në Ukrainë. Vlerat tona nënkuptojnë se ne nuk mund të injorojmë vuajtjet e panevojshme njerëzore që shpalosen në Ukrainë. Situata është jashtëzakonisht sfiduese për një markë globale si e jona dhe ka shumë konsiderata.
Dhe jo vetëm McDonald’s. Starbucks, Coca-Cola, PepsiCo dhe General Electric, markat e kudogjendura globale dhe simbolet e korporatave amerikane njoftuan se po pezullonin përkohësisht biznesin e tyre në Rusi në përgjigje të pushtimit të Ukrainës. Të premten e kaluar, Starbucks kishte thënë se po dhuronte fitime nga 130 dyqanet e saj ruse me bazë në Kuvajt për përpjekjet humanitare në Ukrainë.
Por të martën, kompania tha se do t’i mbyllte përkohësisht ato dyqane. Presidenti dhe CEO i Starbucks, Kevin Johnson në një letër të hapur drejtuar punonjësve tha se ‘Alshaya Group’ do të vazhdojë të paguajë 2000 punonjës rusë të Starbucks. Johnson shkroi se:
Përmes kësaj situate dinamike, ne do të vazhdojmë të marrim vendime që janë të vërteta ndaj misionit dhe vlerave tona dhe do të komunikojmë me transparencë.
Coca-Cola njoftoi se po pezullonte biznesin e saj në Rusi, por ofroi pak detaje. Partneri i Coke-s, Coca-Cola Hellenic Bottling Co. me bazë në Zvicër, zotëron 10 fabrika në Rusi, që është tregu i saj më i madh. Coke ka 21% të aksioneve në Coca-Cola Hellenic Bottling Co. PepsiCo dhe General Electric njoftuan të dy mbyllje të pjesshme të biznesit të tyre rus. Pepsi, me qendër në Purchase, New York, tha se do të pezullojë shitjet e pijeve në Rusi si dhe do të pezullojë çdo investim kapital dhe aktivitet promovues.
General Electric tha gjithashtu në një postim në Twitter se po pezullonte pjesërisht operacionet e saj në Rusi. GE tha se dy përjashtime do të ishin pajisjet thelbësore mjekësore dhe mbështetja për shërbimet ekzistuese të energjisë në Rusi. McDonald’s ka marrë goditjen më të madhe financiare. Ndryshe nga Starbucks dhe kompanitë e tjera të ushqimit të shpejtë si KFC dhe Pizza Hut, McDonald’s zotëron 84% të dyqaneve të saj ruse. McDonald’s gjithashtu ka mbyllur përkohësisht 108 restorante që zotëron në Ukrainë dhe vazhdon t’i paguajë këta punonjës.
