Presidenti francez, Emmanuel Macron iu kërkon partive kryesore politike të Francës që të formojnë një qeveri koalicioni, pas zgjedhjeve parlamentare të javës së kaluar, të cilat panë një koalicion të gjerë të majtë që mori një fitore të papritur.
Në komentet e tij të para publike mbi rezultatin e votimit të së dielës 7 korrik, në një letër të botuar në disa gazeta, Emmanuel Macron vë në dukje se duhet një dialog i sinqertë për të krijuar një shumicë solide për Francën.
Kujtojmë se Fronti i Ri Popullor (NFP) shumëpartiak i krahut të majtë doli i pari në zgjedhje, por nuk arriti që të fitonte shumicën, duke mos lënë asnjë rrugë të qartë për një qeveri të qëndrueshme në Francë.
Tani, parlamenti është i ndarë midis aleancës NFP, kampi i vendit të dytë që i përket aleancës së qendrës “Së bashku” i Macron-it, si dhe RN-ja e ekstremit të djathtë e Marine Le Pen-it, e cila për shkak të një votimi taktik, doli e treta.
Në një deklaratë të publikuar të martën në mbrëmje, aleanca e krahut të majtë i bëri thirrje Macronit që ta ngarkonte atë me formimin e një qeverie. Por, pa partnerë të tjerë, aleanca nuk do të mund të qeveriste dhe mund të bllokohej nga kampet e tjera politike.
Macron hodhi poshtë kërkesën e NFP-së dje e në vend të kësaj, iu bëri thirrje të gjitha partive kryesore që të bashkohen përsëri për të formuar një qeveri, në të njëjtën mënyrë që duhej të parandalonin fitoren e së djathtës ekstreme.
RN-ja doli në krye në raundin e parë të zgjedhjeve më 30 qershor, por vetëm një numër i vogël kandidatësh morën shumicën e nevojshme absolute, që do të thotë se shumica e zonave u vendosën në balotazh, një javë më vonë.
Aleanca e Macronit dhe rivalët e tyre të majtë, më pas u përpoqën të bllokonin Le Pen-in që të arrinte një shumicë absolute me më shumë se 200 kandidatë që u larguan për të shmangur ndarjen e votave në raundin e dytë të së dielës.
Meqenëse krijimi i kompromisit të nevojshëm do të marrë kohë, qeveria aktuale do të mbetet në detyrë me funksion kujdestar, tha Macron.
