Ndërsa lufta në Ukrainë po hyn në një periudhë kritike, Bashkimi Europian ka vendosur se duhet të marrë përgjegjësinë për atë që e sheh si një kërcënim sigurie dhe po përgatitet të ofrojë një pjesë të barrës financiare, ndoshta edhe pa Shtetet e Bashkuara të Amerikës, sipas AP. BE-ja rrallëherë ecën përpara në çështjet ndërkombëtare pa SHBA-të, veçanërisht duke përfshirë konflikte të mëdha, por shpreson se ky vendim do të inkurajojë vendet e tjera të japin ndihmën e tyre.
Të dërguarit e BE-së kanë punuar këtë javë mbi një propozim për t’i dhënë Ukrainës një paketë kredie me vlerë deri në 35 miliardë euro (39 miliardë dollarë).
Në mënyrë thelbësore, kjo kredi do të rrjedhë drejtpërdrejt në buxhetin tuaj kombëtar, tha presidentja e Komisionit Europian, Ursula von der Leyen, në Kiev javën e kaluar. Do t’ju ofrojmë hapësirë fiskale të konsiderueshme dhe shumë të nevojshme. Ju do të vendosni se si t’i përdorni më mirë fondet, duke ju dhënë fleksibilitet maksimal për të përmbushur nevojat tuaja.
Zelensky kërkon të blejë armë dhe vende strehimi për t’iu shpëtuar bombave, si dhe të rindërtojë rrjetin e shkatërruar të energjisë të Ukrainës ndërsa dimri po afron.
Pothuajse 1000 ditë që nga pushtimi, forcat ruse po përparojnë në lindje. Ushtria e Ukrainës ka një kontroll të lëkundur në një pjesë të rajonit të Kurskut në Rusi, gjë që jep nxitje të përkohshme morale. Politikisht, Zelensky shpreson të sigurojë mbështetje për një “plan fitoreje” që mund ta detyrojë presidentin Vladimir Putin të ulet në tryezën e bisedimeve.
Ai po përpiqet të bindë edhe presidentin e Shteteve të Bashkuara, Joe Biden e aleatët e tjerë, që të ndihmojnë në forcimin e Ukrainës, në çdo bisedim të ardhshëm. Por, zgjedhjet në SHBA janë afër dhe sondazhet parashikojnë një garë të ngushtë midis ish-presidentit Donald Trump e zv.presidentes demokrate Kamala Harris.
Trump, i cili ka qenë kritik për ndihmën e SHBA-ve për Ukrainën, tha të mërkurën se “Zelensky duhet të kishte bërë lëshime ndaj Putinit përpara se të fillonte pushtimi në shkurt të vitit 2022”. Shumica e 27 vendeve të BE-së kanë frikë se një fitore e Putinit mund të çojë në pasiguri serioze.
