Hyn në muajin e shtatë lufta mes Izraelit dhe Hamasit, grupit të shpallur terrorist nga Amerika dhe BE-ja. Luftimet kanë rrënuar Rripin e Gazës teksa bisedimet për një armëpushim e për lirimin e pengjeve pritet të rifillojnë në Kajro. Vazhdojnë të rriten kritikat e vazhdueshme ndërkombëtare ndaj qeverisë së Izraelit e kjo për shkak të fushatës së saj ushtarake. Për më tepër, qeveria e kryeministrit Benjamin Netanyahu po përballet me protesta në shtëpi.
Marrëdhëniet e Izraelit me aleaten kryesore, Amerikën janë përkeqësuar. Lindja e Mesme i druhet një përgjigjeje të mundshme nga aleati i Hamasit, Irani, pas sulmit në Ambasadën iraniane në Siri javën e kaluar, për të cilin u fajësua Izraeli.
Izraeli është përballur me stuhi kritikash për vrasjen e shtatë punonjësve të grupit humanitar me bazë në Shtetet e Bashkuara, Kuzhina Qendrore Botërore. Sulmi ndodhi kur ata po shpërndanin ndihma në Gaza më 1 prill.
Presidenti Joe Biden kërkon “armëpushim të menjëhershëm” dhe paralajmëron se mbështetja amerikane për Izraelin varet nga mbrojtja e civilëve e përmirësimi i kushteve humanitare.
Kryeministri i Britanisë së Madhe, Rishi Sunak kërkoi që “ky konflikt i tmerrshëm të marrë fund”. Lufta në Gaza nisi kur më 7 tetor 2023, pjesëtarët e grupit radikal palestinez, Hamas kryen një sulm të beftë në jug të Izraelit, duke vrarë 1.200 civilë e rrëmbyer 250 të tjerë.
Izraeli u përgjigj duke kryer sulmet ajrore dhe tokësore që për pasojë kanë çuar në vrasjen e më shumë se 33 mijë palestinezëve, sipas autoriteteve lokale në Rripin e Gazës. Luftimet kanë detyruar mbi 80% të popullsisë së Gazës të zhvendoset dhe qindra mijëra janë në prag urie, siç kanë theksuar Kombet e Bashkuara dhe agjencitë ndërkombëtare të ndihmës.
Gaza është furnizuar vetëm me ndihma sporadike përmes një pikëkalimi tokësor me Egjiptin, hedhjeve të ndihmave nga ajri dhe dërgesave detare, por agjencitë e ndihmës paralajmërojnë se kjo nuk mjafton për plotësimin e nevojave të palestinezëve.
Pas presionit amerikan, Izraeli është zotuar të lejojë për herë të parë futjen e ndihmave përmes pikëkalimit kufitar në veri të Gazës, Erez. Pas shumë muajsh luftime, shumica e spitaleve të Gazës nuk punojnë dhe më i madhi, Al-Shifa në Gaza City është bërë rrafsh me tokën.
Ndërkohë, raportohet se sot do të ketë një takim në Kajro të Egjiptit për të biseduar për armëpushim dhe lirim të pengjeve. Drejtori i CIA-s, Bill Burns dhe kryeministri i Katarit, Sheik Mohammed bin Abdulrahman bin Jassim Al-Thani do të takohen me zyrtarët egjiptianë për bisedime indirekte mes delegacioneve nga Izraeli e Hamasi, raportoi televizioni egjiptian Al-Qahera.
Hamasi kërkon që marrëveshja të përfshijë një armëpushim të përhershëm dhe që Izraeli t’i tërheqë forcat nga Gaza. Izraeli i ka hedhur poshtë këto kërkesa deri tani. Uashingtoni e fajëson Hamasin për dështimin e bisedimeve deri tani, pasi ky i fundit po refuzon t’i lirojë pengjet e prekur nga sëmundjet.
