Shqipëria mund të synojë Botërorin, nëpëmjet Ligës së Kombeve (Nations League). Ashtu si në kualifikueset e Europianit, Liga e Kombeve do të vihet në shërbim edhe të Botërorit 2026. Me tri kombëtare të kualifikuara automatikisht si vende organizatore, si SHBA, Meksikë dhe Kanada, 16 ekipe nga Europa do të kërkojnë një biletë në Botërorin e “çuditshëm” dhe për herë të parë me 48 ekipe.
Kualifikueset për UEFA-n do të nisin në mars 2025, ndërkohë shorti pritet të hidhet në fund të vitit, ku do të ndajë 12 grupe me nga 4 ose 5 skuadra.
Nga këto grupe, 12 vendet e para do të kualifikohen direkt në Botëror, ndërsa 12 vendet e dyta do të shkojnë në një fazë play-off, por me to do të bashkohen edhe 4 vende nga Liga e Kombeve. Këto 4 vende do të jenë kombëtare që nuk janë renditur në dy vendet e para në kualifikuese, por më poshtë. Ndërkohë, do të shihet renditja që ato kanë në Ligën e Kombeve, për të përcaktuar se cilat do të jenë.
Duke qenë se kualifikueset do të ndahen në 12 grupe me nga 4 ose 5 skuadra, shanset për Shqipërinë janë edhe më të mëdha për të shkuar në playoff. Edhe nëse kuqezinjtë dalin në vendin e tretë në grup, sërish kanë shanse për tu bashkuar me këtë fazë, nëse në Ligën e Kombeve arrijnë rezultate të mira, ku më i favorshmi, kuptohet se do të ishte fitimi i grupit.
Liga e Kombeve mund të jetë një mundësi shumë e mirë për kuqezinjtë, për të tentuar një biletë për në Botërorin e 2026-s.
