Australia po planifikon të ndalojë shitjen e cigareve elektronike jashtë farmacive javën e ardhshme. Këtë ka njoftuar Ministria e Shëndetësisë. Qeveria arriti një kompromis me një partner më të vogël të koalicionit, partinë “të Gjelbërit”, në mënyrë që ligji për të të kalonte në Senat, dhoma e lartë e Parlamentit.
“Legjislacioni ynë lider në botë do t’i kthejë cigaret elektronike në atë për të cilën u tregtuan fillimisht; si produkte terapeutike për të ndihmuar duhanpirësit e varur të largojnë zakonin,”-tha ministri Mark Butler në një deklaratë. Nga e hëna e ardhshme, do të jetë e paligjshme furnizimi, prodhimi, importimi ose shitja e tyre jashtë një farmacie në Australi. Ndalimi vlen për të gjitha llojet e cigareve elektronike, pavarësisht nëse ato përmbajnë nikotinë.
Ligji do të miratohet nga Parlamenti deri të enjten. Shoqata e Farmacistëve të Australisë, e cila përfaqëson pronarët e farmacive, ka kundërshtuar farmacitë që shesin cigare elektronike të dëmshme, sepse ka pak prova që ato i ndihmojnë njerëzit të lënë duhanin. Michael Boning, një zëdhënës i Shoqatës Mjekësore Australiane, grupi më i madh i mjekëve, tha se ligji i ri do të krijonte një ndryshim sizmik në përballueshmërinë e avullimit.
Ndërkaq, duhani, alkooli, ushqimet e përpunuara (UPF) dhe lëndët djegëse fosile vrasin 2.7 milionë njerëz në vit në Europë, sipas Organizatës Botërore të Shëndetësisë (OBSH), e cila u ka bërë thirrje qeverive të vendosin rregulla më të ashpra për produktet që dëmtojnë shëndetin. Në një raport, OBSH tha se industritë e fuqishme po nxisin sëmundjet dhe vdekjen e parakohshme duke përdorur marketingun “mashtrues”.
Rikujtojmë, se sipas një raporti të OBSH-së për Europën shkalla e përdorimit të alkoolit dhe cigareve elektronike në mesin e moshave nga 11 deri në 15 vjeç është alarmante. “Përdorimi i gjerë i substancave të dëmshme nga fëmijët në shumë vende të rajonit europian dhe më gjerë është një kërcënim serioz për shëndetin publik”-tha drejtori rajonal i OBSH-së për Europën Hans Kluge.
