Holanda ka vendosur të bëjë të ligjshme eutanazinë për fëmijët që janë shumë të sëmurë, të cilët nuk kanë mundësi trajtimi. Ministri i Shëndetësisë Ernst Kuipers u tha parlamentarëve se donte të rishikonte protokollin, i vlefshëm deri tani vetëm për të sapolindurit, për të mbuluar edhe fëmijët e moshës nën 12-vjeç të cilët vuajnë në mënyrë të padurueshme dhe për të cilët opsionet e kujdesit paliativ nuk janë të mjaftueshme.
“Jam i kënaqur që, pas konsultimeve intensive me të gjitha palët e përfshira, kemi arritur një zgjidhje që do t’i ndihmojë këta fëmijë të sëmurë, prindërit e tyre dhe gjithashtu mjekët. Eutanazia do të jetë e mundur vetëm kur është e vetmja mundësi për t’i dhënë fund vuajtjeve të një fëmije. Po flasim për fëmijë që janë aq të sëmurë sa vdekja është e pashmangshme dhe ata pritet të vdesin së shpejti”, deklaroi Kuipers.
Së fundmi Parlamenti i Portugalisë miratoi edhe një herë një ligj në favor të dekriminalizimit të eutanazisë, i cili u rihartua pasi u tërhoq nga Gjykata Kushtetuese. Projektligji, u miratua nga parlamenti për të katërtën herë në tre vjet, falë votave të mazhorancës socialiste. Projektligji do t’i paraqitet kreut të shtetit, një katolik i vendosur dhe ish-profesor i drejtësisë.