Tifozët shqiptarë që pushtuan qytetet e Gjermanisë në mbështetje të Kombëtares Shqiptare të Futbollit ishin një surprizë për vendasit dhe mediat e shtetit që po pret “Euro 2024”-ën. Krahas entuziazmit, numri i lartë i tyre ishte një tjetër element që tërhoqi vëmendjen, me 50 mijë tifozë në stadium dhe 50 mijë të tjerë që “pushtuan” Dortmundin.
Ndonëse mes tyre kishte shumë emigrantë, sërish shumë shqiptarë nuk u kursyen për të ndjekur skuadrën e zemrës. Të dhënat e Organizatës Botërore të Turizmit, të përpunuara nga “Monitor” tregojnë se shqiptarët, që sërisht u renditën të fundit në të ardhurat për frymë në Europë, nuk janë shumë kursimtarë në udhëtimet jashtë vendit, madje “konkurrojnë” me shtetet që i kanë të ardhurat për frymë shumë më të larta se ne.
Sipas Organizatës Botërore të Tregtisë, në vitin 2023, shpenzimet e shqiptarëve jashtë ishin 2.5 miliardë dollarë. Në raport me popullsinë, shpenzimi mesatar për banor ishte 1040 dollarë në vit, sipas të dhënave të përpunuara nga “Monitor”.
Italianët, që edhe në Shqipëri janë etiketuar si më kurnacët, e kanë shpenzimin mesatar për banor prej 580 dollarësh në vit. Për francezët, ky tregues është 721 dollarë, për spanjollët 578. Grekët njihen si popull që nuk udhëton jashtë vendit për pushime dhe shpenzimin për banorë e ka 278 dollarë.
Shqiptarët mbajnë rekordin dhe në rajon. Serbët, që vijnë të dytët pas nesh, kanë shpenzime gati sa gjysma (495 dollarë). Mali i Zi dhe Bosnjë-Hercegovina renditen në fund të listës, me përkatësisht 162 dhe 124 dollarë, duke lënë në fund vetëm turqit, që e kanë ketë tregues 93 dollarë. Të dhënat për Kosovën dhe Maqedoninë e Veriut mungojnë.
Në Europë, rekordin për shpenzimet për udhëtimet e mbajnë vendet e ftohta, por edhe më të pasura. Në vend të parë është Islanda, me shpenzime gati 4200 dollarë/banor për udhëtimet jashtë vendit, e ndjekur nga Norvegjia (3300), Zvicra (gati 2700), Irlanda (gati 2000), Danimarka, rreth 1800 dollarë.
Gjithnjë e më shumë udhëtime jashtë
Që nga viti 2011, kur u liberalizuan vizat, daljet e shtetasve shqiptarë jashtë vendit kanë shënuar rritje të vazhdueshme. Nga 3.4 milion dalje në vitin 2010, treguesi arriti në gati 6 milion më 2019-ën. Pas një rënieje të ndjeshme në vitin 2020, si rrjedhojë e kufizimeve të vendosura nga pandemia, lëvizjet jashtë vendit filluan të rriteshin me shpejtësi, duke arritur në rekordin e 6.9 milionëve vitin e kaluar, sipas të dhënave që publikohen nga INSTAT-i.
Hyrja e operatorëve ajrorë me kosto të ulët, teksa çmimet e biletave zbritën edhe në 20 euro një drejtim, kanë ndikuar që gjithnjë e më shumë shtetas të udhëtojnë jashtë vendit për pushimet apo për të vizituar të afërmit emigrantë.
Në të njëjtën linjë me daljet janë rritur dhe shpenzimet e shqiptarëve jashtë. Sipas të dhënave të Bankës së Shqipërisë, për vitin e kaluar, paratë që kanë dalë jashtë në formën e udhëtimeve ishin 2.3 miliardë euro nga 1 miliard euro në vitin 2010. Në raport me vitin e mëparshëm, shpenzimet jashtë u rritën me 32%.
