Në fjalimin e tij të përnatshëm nga dritarja e banesës, ish-kryeministri Sali Berisha u ndal sonte në zhvillimet e fundit të komisionit hetimor parlamentar që po shqyrton shërbimet publike të sterilizimit dhe check-up në sektorin e shëndetësisë. Berisha ka ngritur akuza të forta ndaj Vilma Nushit, biznesmene, duke e quajtur atë “kriminele” dhe “vampir” për abuzimet që ai pretendon se ka kryer në lidhje me koncensionin e check-up-it.
Sipas Berishës, Nushi është përgjegjëse për një skemë të fshehur që ka shkaktuar shpërdorim masiv të fondeve publike, duke regjistruar qindra mijëra analiza të pavlefshme, për të cilat janë paguar miliona euro nga buxheti i shtetit. Ai theksoi se këto analiza, të cilat nuk janë kryer kurrë, janë regjistruar dhe faturuar nga Nushi dhe kompania që menaxhon koncensionin e check-up-it, duke i shkaktuar kështu dëme të mëdha financiare shtetit shqiptar.
“Vilma Nushi, një hajdutja e pangopur, ka marrë dhjetëra e dhjetëra milionë euro nga taksapaguesit shqiptarë për analiza që nuk janë bërë kurrë. Ky është një akt revolte kombëtare,” tha Berisha në fjalimin e tij, duke shtuar se ky abuzim përbën një shkelje flagrante të ligjit dhe moralit. Ai akuzoi Nushin për mungesë përgjegjësie dhe për mosparaqitje në komisionin hetimor, duke e quajtur atë një “kriminelë të pafytyrë” që ka ndihmuar në mbulimin e kësaj skeme.
Për më tepër, Berisha përdori terma të ashpra duke e quajtur Nushin “vampir” për shfrytëzimin e parasë publike dhe shpërfilljen e ligjit. Ai theksoi se ajo dhe personat e tjerë përgjegjës për këtë skandal duhet të mbajnë përgjegjësi para drejtësisë dhe të japin llogari për dëmet që kanë shkaktuar ndaj qytetarëve shqiptarë.
Ky është vetëm një nga shumë skandalet që Berisha ka ngritur lidhur me shpenzimet e fondeve publike për shërbimet shëndetësore, duke kërkuar transparencë dhe hetime të thella për çdo abuzim me buxhetin e shtetit.
