Sot iu vu zjarri një shtëpie në lagjen Kodra e Minatorëve, në veri të Kosovës, zonë e banuar me shumicë serbe. Lajmin e bëri të ditur ministri i Administrimit të Pushtetit Lokal, Elbert Krasniqi, si dhe e rikonfirmoi për Radion Evropa e Lirë, zv.drejtori i Policisë së Kosovës për veriun. Veton Elshani tha se zjarri u shua nga një patrullë policore e dëme pësoi vetëm dera kryesore e hyrjes.
Dyshojmë se kemi të bëjmë me zjarrëvënie dhe se ky zjarr është shkaktuar nga një koktej i molotovit. Policia është duke punuar në ndriçimin e rastit.
Përmes një postimi në Facebook, ministri Krasniqi vuri në dukje se shtëpia ishte ndërtuar nga qeveria e Kosovës, për të mbështetur kthimin e banorëve në këtë lagje multietnike. Ai akuzoi presidentin e Serbisë, Aleksander Vuçiç për atë që e quajti “nxitje të padurimit etnik”.
Siç theksoi më tej, Vuçiç “ka mbetur i mbyllur në propagandën e tij” dhe “ka humbur kontrollin e strukturave paralele në pjesën veriore”. Prej vitesh, atje kanë funksionuar struktura paralele të Serbisë, por në fund të muajit të kaluar, autoritetet e Kosovës i kanë mbyllur disa prej tyre. Kjo me arsyetimin se kanë vepruar jashtë ligjeve të Kosovës, çka çoi në protesta.
Ky veprim është dënuar nga Beogradi zyrtar, si edhe nga bashkësia ndërkombëtare, që i ka cilësuar si të njëanshëm e të pakoordinuar këto hapa. Po ashtu, kërkon nga Kosova që të gjitha çështjet që lidhen me situatën në veri, t’i trajtojë në kuadër të dialogut për normalizimin e marrëdhënieve me Serbinë, i cili ndërmjetësohet nga Bashkimi Europian. Sot në Bruksel po mbahet takimi i radhës mes palëve të përfshira.
Fokusi te zbatimi i marrëveshjeve të arritura. Besnik Bislimi e Petar Petkoviç pritet të kenë takime veç e veç me ndërmjetësin Lajçak, por jo mes tyre. Para takimit, Lajçak vizitoi Prishtinën e Beogradin për të caktuar datën dhe agjendën. Ndërkohë, pati aludime se takimi i planifikuar ishte refuzuar nga pala serbe çka nuk ndodhi. Kryeparlamentari i Kosovës, Glauk Konjufca ripërsëriti se dialogu “ka vdekur” për këtë vit. Edhe analistët nuk presin hapa konkretë.
Qeveria e Kosovës thotë se veprimet e saj kanë për qëllim shtrirjen e rendit e të ligjit.
