Kryetari i Kuvendit të Kosovës, Glauk Konjufca, tha se nuk është kompetencë e Bashkimit Europian që të propozojë draft-statut për Asociacionin e komunave me shumicë serbe në Kosovë.
Drafti që është dorëzuar nga ana e Bashkimi Evropian, ka një parregullsi, sepse kjo nuk është kompetencë e BE-së dhe mendoj që nëse BE-ja nuk e modifikon këtë qëndrim, atëherë po i bie që do që t’ia marrë me zor një kompetencë shtetit të Kosovës.
Kryeministri Albin Kurti tha në një intervistë se emisari i BE-së për dialogun Kosovë-Serbi, Mirosllav Lajçak, mund ta dërgojë draftin në Komisionin e Venecias. Draftin e BE-së, Kurti e cilësoi “non-paper”.
Eshtë një ide të cilën edhe unë si kryetar i Kuvendit e mbështes, tha Konjufca. Çështja e Asociacionit nuk mund të marrë epilog për shkak të mënyrës si është shtruar nga bashkësia ndërkombëtare.
Vitin e kaluar, Bashkimi Europian, si ndërmjetës i dialogut mes Kosovës dhe Serbisë, ua prezantoi palëve një draft-statut për Asociacionin, i cili u pranua në parim. Në të njëjtin vit, Kosova dhe Serbia arritën një marrëveshje për normalizimin e raporteve, që përfshin edhe sigurimin e një niveli të vetëmenaxhimit të komunitetit serb e zbatimin e të gjitha marrëveshjeve të arritura në dialog.
Në kuadër të dialogut që ndërmjetësohet nga BE-ja, Kosova dhe Serbia kanë arritur dy marrëveshje për Asociacionin: më 2013 dhe 2015-ën.
Në vitin 2015, Gjykata Kushtetuese tha se Marrëveshja mbi parimet për themelimin e Asociacionit nuk ishte në harmoni të plotë me aktin më të lartë juridik të shtetit. Harmonizimi, sipas Kushtetueses, mund të bëhet përmes akteve nënligjore.
Nuk mendoj që Kosova ka të drejtë të penalizohet se është vonuar [për draftin e Asociacionit], penalizimet mund të jenë të tjera, penalizim kanë qenë sanksionet, edhe atë e kemi vuajtur ne si Kosovë, çmimet kanë qenë, dhe çmimet i ka paguar Kosova. Por, kompetencën nuk mund të e na marrë BE-ja, për ta propozuar një draft, i cili do të jetë draft zyrtar, dhe që pastaj kalon në Gjykatë Kushtetuese e në instanca të tjera, tha Konjufca.
Kosova dështoi të futej në axhendën e takimit të Komitetit të Ministrave në Këshillin e Europës, i mbajtur në mes të majit në Strasburg, pasi shtetit iu vendos kusht që të lëvizte përpara me themelimin e Asociacionit të komunave me shumicë serbe.
