Ekspertët kanë paralajmëruar njerëzit për “gjënë më të keqe” që mund të bëjnë kur zgjohen në mes të natës. Gjumi i mirë i natës është vendimtar për rikuperimin tonë. Por, shpesh është më e lehtë të thuhet se sa të bëhet. Ka shumë truke për t’i ndihmuar njerëzit të bien në gjumë, por ekspertët në këtë fushë thonë se një gjë nuk duhet ta bëni kurrë nëse zgjoheni në mes të natës. Të qenit i shqetësuar për të fjetur mund të përkeqësojë më tej ciklin tuaj të gjumit.
“Të mendoni për faktin se nuk po flini mund të të zgjojë mendjen dhe t’ju bëjë më të shqetësuar. Një veprim më i mirë është të pranoni situatën tuaj mos i rezistoni të qenit zgjuar dhe të gjeni një fokus alternativ”-deklaroi Fiona Barwick, drejtoresha e Programit Sleep & Circadian Health në Shkollën e Mjekësisë të Universitetit Stanford. Më shumë ekspertë të gjumit kanë ofruar këshilla të tjera që mund të tingëllojnë të çuditshme, por që mund të kenë një efekt më të madh në rikthimin në gjumë sesa thjesht të shtriheni atje me mendimet tuaja. Eksperti i gjumit Luis F. Buenaver shpjegoi:
Është e rëndësishme të mos qëndroni në shtrat. Nëse e bëni këtë, truri dhe trupi juaj do të mësohet me zgjimin tuaj në shtrat, në vend të gjumit. Mund të jetë e vështirë ta lini një shtrat të ngrohtë dhe të rehatshëm pasi zgjoheni në mes të natës. Por mendoni për këtë hap si një investim për gjumë më të mirë, nëse jo sonte, atëherë nesër mbrëma dhe në të ardhmen.
Cilësia e gjumit shpesh ndikohet nga faktorë të shumtë. Një studim i publikuar në “Journal of Clinical Sleep Medicine”, nxjerr në pah një faktor të rëndësishëm; ekspozimin ndaj dritës natyrale. Sipas studimit, drita natyrale, veçanërisht ajo që merrni herët në mëngjes, ndihmon në rregullimin e ritmeve të gjumit dhe zgjimit.
Drita e diellit ka një ndikim të drejtpërdrejtë në prodhimin e melatoninës, hormonit që ndihmon në rregullimin e ciklit të gjumit. Kur ekspozoheni ndaj dritës së diellit në orët e para të ditës, trupi juaj merr një sinjal që është koha për t’u zgjuar dhe për të qenë aktivë, duke rezultuar në një gjumë më të qetë gjatë natës.
