Kina tha se do të “kundërshtonte fuqishëm” çdo shitje të detyruar të TikTok, në përgjigjen e saj të parë të drejtpërdrejtë ndaj kërkesave të administratës Biden që pronarët kinezë të aplikacionit të shesin pjesën e tyre të kompanisë ose të përballen me një ndalim në tregun e saj më të rëndësishëm.
Komentet erdhën teksa drejtori ekzekutiv i TikTok, Shou Chew dëshmoi para ligjvënësve amerikanë në mes të shqyrtimit në rritje mbi lidhjet e aplikacionit me Pekinin. Ministria e Tregtisë e Kinës tha se një shitje e detyruar e TikTok do të dëmtonte seriozisht besimin e investitorëve globalë në Shtetet e Bashkuara. Shu Jueting, një zëdhënëse e ministrisë, në një konferencë shtypi në Pekin tha se:
Nëse lajmet për një shitje të detyruar janë të vërteta, Kina do ta kundërshtojë atë me vendosmëri. Shitja e TikTok përfshin eksportin e teknologjisë dhe procedurat e licencimit administrativ duhet të kryhen në përputhje me ligjet dhe rregulloret kineze. Qeveria kineze do të marrë një vendim në përputhje me ligjin.
Më parë, Pekini nuk kishte opinion të drejtpërdrejt mbi një shitje të mundshme të detyruar. Megjithatë, duke filluar nga viti 2020, ajo kishte sinjalizuar se donte të mbronte teknologjinë kineze duke shtuar algoritme rekomandimi, të cilat mund të përfshijnë TikTok, në një listë teknologjish të kufizuara për eksport. Analistët dhe ekspertët ligjorë besojnë se Pekini në fund të fundit mund të preferojë që TikTok të largohet nga tregu amerikan në vend që të tërhiqet nga algoritmi i tij.
Përballë presionit perëndimor që është gjithnjë në rritje, gjiganti teknologjik kinez, TikTok ka përditësuar udhëzimet lidhur me përmbajtjen. Shtetet e Bashkuara dhe aleatët janë të shqetësuar se TikTok-u mund të përdoret për të shpërndarë informacione të rreme. Ky aplikacion i njohur për formatin e videove të shkurtra është në pronësi të kompanisë kineze, ByteDance. Shumë dyshojnë në ndarjen e të dhënave me Pekinin zyrtar.
