Që nga nisja e studimit të helmit të disa kafshëve si gjarpërinjtë, merimangat apo akrepat ka gjithmonë përballë një kontradiktë të dukshme. Nga njëra anë, ekziston fakti se helmet janë të pasura me substanca antimikrobike dhe për këtë arsye konsiderohen një mjedis krejtësisht steril, pasi këto substanca vrasin bakteret me të cilat bien në kontakt. Nga ana tjetër, ekziston konstatimi se shumë pickime gjarpërinjsh apo pickime merimangash shkaktojnë infeksione, të cilat shkaktohen pikërisht nga ato mikroorganizma që helmi supozohet të vrasë.
Si mund të shpjegohet kjo? Sipas një studimi të ri nga Universiteti Northumbria i publikuar në ‘Microbiology Spectrum’, përgjigja qëndron te disa baktere, të cilat janë përshtatur për të mbijetuar në helm pa pësuar pasoja. Përafërsisht 2.7 milionë njerëz në mbarë botën trajtohen çdo vit në spitale për pasojat e një pickimi helmues. Nga këto, 75% zhvillojnë edhe një infeksion bakterial. Studimi shpjegon se “fajtori” më i shpeshtë është Enterococcus faecalis. Mendimi i deritanishëm ishte se këto infeksione ishin rezultat i një plage të hapur të lënë të ekspozuar ndaj ajrit, por studimi Northumbrian e hedh poshtë këtë supozim.
Duke analizuar helmin e pesë llojeve të gjarpërinjve dhe dy të merimangave, autorët e studimit identifikuan, në të 7 rastet, praninë e ADN-së bakteriale në lëng. Një studim i thelluar i kësaj ADN-je konfirmoi se këto janë baktere të njohura si Enterococcus i lartpërmendur të cilët, kanë pësuar mutacion për t’i rezistuar substancave antibakteriale të pranishme në helm. Autorët e studimit konfirmuan gjithashtu në mënyrë eksperimentale gjetjet e tyre, duke marrë një mostër të Enterococcus fecalis dhe e zhytën në një lëng me një përqendrim shumë të lartë të helmit të kobrës. Ata zbuluan se bakteret nuk e kishin problem të mbijetonin në një mjedis që përmban një koktej të vërtetë antibiotikësh, të krijuar për të vrarë vetë bakteret.
Mjetet tradicionale diagnostikuese nuk arrijnë të identifikojnë saktë këto baktere dhe për këtë arsye ekziston rreziku që një të lënduari t’i jepet antibiotiku i gabuar. Sipas autorëve, studimi tregon se, përballë pickimit të gjarprit apo kafshimit të merimangës, duhet të merren masa të menjëhershme jo vetëm për të neutralizuar helmin, por edhe për të ndaluar infeksionin e mundshëm të shkaktuar nga bakteret “të pathyeshme” që jetojnë atje.
