Hetuesit kanë përcaktuar se një kafkë e zbuluar në vitin 1978 në murin e një shtëpie në Illinoi i përkiste një adoleshenteje nga Indiana e cila vdiq mbi 150 vjet më parë. Sipas të dhënave nga zyra e mjekut ligjor të qarkut Kane, kafka u gjet ndërsa pronari i një shtëpie në qytetin Batavia po bënte rinovime. Në atë kohë policia hapi hetime por pa sukses dhe kafka u dërgua në një magazinë të një muzeu të qytetit Batavia.
Në mars të vitit 2021, mbikëqyrësit e muzeut e zbuluan kafkën gjatë një inventari dhe e dërguan atë në zyrën e mjekut ligjor të policisë. Laboratorët Othram në Teksas, të cilat bashkëpunojnë me organet e rendit, ishin në gjendje të ndërtonin një profil të ADN-së së gjetur në kafkë që sugjeronte se i përkiste Esther Granger-it, një gruaje 17 vjeçare që vdiq gjatë lindjes së bebes në Merriville të Indianës në vitin 1866. Hetuesit e njëjtësuan profilin e ADN-së me stërnipin e zonjës Granger, Wayne Silvar, çka mundësoi konfirmimin e identitetit të saj.
Kafka u varros në Batavia në muajin gusht me shpenzimet e qytetit. Është e paqartë se si kafka përfundoi në qytetin Batavia. Të dhënat tregojnë se ajo u varros në Lake County të Indianës. Mjeku i qarkut Kane, Rob Russell, spekuloi në një njoftim për shtyp se grabitësit e varreve mund ta kenë nxjerrë trupin e saj për t’ia shitur mjekëve që kërkonin të mësonin më shumë rreth anatomisë së njeriut. Ndërkaq, në Galerinë e Arteve të Perthit, teknologjia i ka ndihmuar njerëzit që të ‘komunikojnë’ me individë nga e kaluara. Rindërtimet ndërthurin artin, antropologjinë, teknologjinë dhe arkeologjinë. Ato bazohen në kafkat e gjetura në të gjithë Skocinë, duke përfshirë një grua nga epoka e bronzit që jetoi rreth 4000 vjet më parë, një burrë nga epoka e hekurit nga viti 500 pas Krishtit dhe burra e gra që jetuan gjatë periudhës mesjetare të Skocisë në shekujt 14 dhe 15.
