Një burrë është paraqitur para një gjykatësi francez i dyshuar për vjedhjen e 14 majmunëve. Majmunët, që i përkasin gjinisë Saimiri, u vodhën një javë më parë nga një kopsht zoologjik në La Londe-les-Maures, rreth 70 km në lindje të Marsejës. Të gjithë majmunët kishin mikroçipe dhe njëri u gjet më vonë në bodrumin e një pallati në Marsejë ku jeton i dyshuari 20-vjeçar. Çdo majmun mund të kushtojë mijëra euro në tregun e zi.
Prokurorët besojnë se i arrestuari punonte si pjesë e një bande të organizuar. Samuel Finielz, prokuror i lartë në qytetin port pranë Toulon, tha se automjeti i të dyshuarit u pa pranë skenës së krimit. I akuzuari 20-vjeçar ka mohuar çdo përfshirje në vjedhje. Pas arrestimit të tij, ai u mbajt për 48 orë përpara paraqitjes së tij para një gjyqtari hetues.
Prokurorët kanë kërkuar akuza për vjedhje dhe mbajtje e transportim të një specie të mbrojtur si pjesë e një bande të organizuar. Ata kanë kërkuar që i dyshuari të mbetet në paraburgim për të penguar shkatërrimin e provave dhe kontaktimin me ndonjë bashkëpunëtor. Dënimi maksimal është shtatë vjet burg. Majmunët me origjinë nga Amerika Qendrore dhe Jugore janë në Bashkimin Ndërkombëtar për Ruajtjen e Natyrës të ashtuquajturën “lista e kuqe” e specieve të rrezikuara.
