Ka hyrë në fuqi ligji për përdorimin e cigareve elektronike, ku sipas rregullores do të blihen vetëm në farmaci në një përpjekje për të frenuar përdorimin e tyre tek të rinjtë. Ligji do të kufizojë shitjet e cigareve elektronike vetëm në farmaci dhe do t’u kërkojë klientëve të konsultohen me një farmacist përpara se të blejnë një cigare elektronike. Për ata nën 18 vjeç do të kërkohet një recetë.
Partia Laburiste në pushtet u detyrua të tërhiqej nga një plan më i gjerë i cili do të kishte kufizuar shitjet vetëm për njerëzit që kanë recetë pas protestave të opozitës, të cilët shprehën shqetësimin se do të kufizonte aksesin për ata që dëshironin të ndalonin duhanin dhe do të rëndonte sistemin shëndetësor.
Por ligji u miratua pas një vonesë prej 3 muajsh, me përdoruesit e cigareve elektronike mbi moshën 18 vjeç që do të kenë nevojë për një recetë. Rreth 22% e australianëve të moshës 18 deri në 24 vjeç kanë përdorur një cigare elektronike të paktën një herës, sipas të dhënave. Përveç kufizimit të shitjes së cigareve elektronike, ligjet gjithashtu kufizojnë përqendrimin e nikotinës në lëngjet dhe shijet e rimbushjes së cigareve elektronike.
Australia ndaloi shumicën e importeve të cigareve elektronike në fillim të vitit. Importuesit tani do të duhet të aplikojnë për një licencë nga bordi qeveritar i kontrollit të drogës. Ndërsa cigaret elektronike shiten gjerësisht në dyqane të vogla, qeveria thotë se masa do të reduktojë përdoruesit me qindra mijëra.
Ndërkaq, sipas një raporti të OBSH-së për Europën shkalla e përdorimit të alkoolit dhe cigareve elektronike në mesin e moshave nga 11 deri në 15 vjeç është alarmante. “Përdorimi i gjerë i substancave të dëmshme nga fëmijët në shumë vende të rajonit europian dhe më gjerë është një kërcënim serioz për shëndetin publik”-tha drejtori rajonal i OBSH-së për Europën Hans Kluge.
Ai bëri thirrje për rritjen e taksave, kufizime në pikat e shitjes dhe reklamat, si dhe ndalimin e aromatizuesve në cigaret elektronike. Pas viteve të përdorimit në rënie të substancave psikoaktive, disa prova sugjerojnë se pandemia e Covid-19 ka çuar në një rritje të re të përdorimit, zbuloi raporti, i cili mblodhi të dhëna nga 280,000 të rinj në Europë, Azinë Qendrore dhe Kanada.
