Ndërsa amerikanët presin të dëgjojnë nga Zëvendës Presidentja Kamala Harris të mërkurën në mëngjes, ekipi i demokrates bëjnë thirrje që fushatës së saj t’i lihet hapësira dhe koha për të përpunuar humbjen e tyre.
“Ju lutemi jepni kohë fushatës Harris për të përcaktuar pikat e forta dhe të dobëta të tyre,” tha ekipi i Harris.
Në Natën e Zgjedhjeve, ekipi i Harris shprehu besimin se demokratja do të merrte 270 vota elektorale.
Donald Trump triumfoi në zgjedhjet presidenciale të së martës në Shtetet e Bashkuara të Amerikës, duke shënuar kështu një rikthim historik në Shtëpinë e Bardhë, ku ai shërbeu si president gjatë viteve 2017-2021.
Gjatë fjalimit të fitores në Florida, republikani Trump tha para simpatizantëve të tij se Amerika i kishte dhënë “një mandat të pabesueshëm dhe të fuqishëm”.
“Kjo është një fitore politike që vendi ynë s’e kishte parë kurrë,” tha Trump, duke ripërsëritur premtimet e fushatës se do të punonte për të bërë Amerikën të madhe përsëri.
Rezultati përfundimtar nuk ka dalë ende, por siç raporton BBC, nga shtatë shtetet vendimtare, Trump fitoi Karolinën e Veriut, Xhorxhian, Pensilvaninë dhe Wisconsin, ndërsa është në avantazh edhe në Michigan, Nevada dhe Arizona.
Kandidatja e Demokratëve, zëvendëspresidentja Kamala Harris nuk u është drejtuar ende mbështetësve të saj me një fjalim, por simpatizanët e dëshpëruar lanë festën e saj shumë orë përpara se të dilte rezultati përfundimtar.
Fitorja e Trump u prit me entuziazëm të ngjashëm si nga mazhoranca , ashtu edhe nga opozita në Shqipëri.
Kryeministri Edi Rama postoi në platformën X një foto nga zyra e tij duke parë live fjalimin e fitores së Trump, shoqëruar me një mesazh urimi për “këtë fitore të jashtëzakonshme”.
“Pres me padurim të kem privilegjin e madh të punoj me Presidentin e 47-të për të përmirësuar më tej partneritetin tonë për paqe, prosperitet dhe përparim të mëtejshëm,” shkroi Rama.
Ndërsa kreu i opozitës, ish-kryeministri Sali Berisha, e cilësoi fitoren e tij një “triumf” dhe i kushtoi një mesazh më të gjatë për zgjedhjet presidenciale në SHBA, duke cilësuan Partinë Demokratike që ai drejton “simotër” të Partisë Repubikane të Trump.
“Me votën e tyre plebishitare, qytetarët amerikanët u ngritën mbi hipokrizinë, mashtrimin, përpjekjet për t’iu diktuar me të gjitha mjetet udhëheqësin e tyre dhe rikthyen, zgjodhën për të ardhmen e ndritur që meritojnë…,” shkroi Berisha në profilin e tij në Facebook.
