Organizata Trump, një grup prej rreth 500 subjektesh biznesi ka arritur një marrëveshje për të shitur hotelin e saj të njohur në Washington për 375 milionë dollarë. Sipas marrëveshjes së arritur, hoteli “Trump International” tashmë do të quhet “Waldorf Astoria” dhe do të menaxhohet nga grupi Hilton.
Muajin e fundit, një hetim i Kongresit zbuloi se hoteli humbi më shumë se 70 milionë dollarë gjatë presidencës së Donald Trump. Ky hotel i kompanisë së ish-presidentit të Shteteve të Bashkuara u hap për publikun për herë të parë në shtator të vitit 2016.
Sipas burimeve për “The Wall Street Journal” dhe “Bloomberg”, marrëveshja me kompaninë e investimeve “CGI Merchant Group” do të finalizohet në fillim të vitit të ardhshëm. Rikujtojmë, se së fundmi Donald Trump njoftoi planet për të përdorur aplikacionin e tij të medieve sociale. Ndërsa llogaritë i janë ndaluar nga Twitter dhe Facebook, rrjeti Trump do të quhet ‘TRUTH Social’ e pritet të fillojë së funksionuari në nëntor.
“Fillimisht, për një numër të caktuar njerëzish dhe më pas, vitin e ardhshëm do të nisë përhapja mbarëkombëtare”, – siç njofton Trump Media&Technology Group (TMTG). ‘TRUTH Social’ synon të rivalizojë “kompanitë e mëdha teknologjike”, të tilla si Twitter dhe Facebook, që e kanë ndaluar ish-shefin e Shtëpisë së Bardhë.
Megjithatë sipas raportimeve të medieve amerikane, faqja e mediave sociale e shpallur nga Trump, është hakeruar përpara se të prezantohej. Sipas “Washington Post”, një grup hakerash që punonin kundër përhapjes së urrejtjes dhe dezinformatave pretenduan se kishin hakuar faqen e mediave sociale ‘TRUTH’ duke hyrë në të. “New York Times” citoi gjithashtu burime të ndryshme në raportin e saj duke thënë se hakerët kanë hakuar disa llogari të faqeve të internetit të rrjeteve sociale të Trump.
‘TRUTH Social’ do të zhvillohet nga një kompani e re e formuar nga bashkimi i Grupit të Medias dhe Teknologjisë Trump (TMTG) dhe një kompanie speciale (SPAC). Rrjeti ka të ngjarë të jetë i ngjashëm me Facebook, por disa besojnë se ai do të jetë një platformë mikroblogimi e ngjashme me Twitter.
Ish-kreu i Shtëpisë së Bardhë ka caktuar dy njerëz të besuar për të drejtuar kompaninë më të re të krijuar. Patrick Francis Orlando, është shefi ekzekutiv i SPAC (kompani blerjesh me qëllim të veçantë) që ndihmoi ish-Presidentin Trump të bënte publike kompaninë e tij të medias dhe teknologjisë dhe është gjithashtu shefi i financave të një firme misterioze me zyra në Wuhan. 49-vjeçari, drejton dy SPAC, të njohura edhe si kompani të kontrollit të bardhë, që synojnë t’i bëjnë kompanitë private të dalin publike përmes bashkimeve dhe blerjeve.
