“Isha 19 vjeçe kur më mashtruan të udhëtoja për në Bregun e Fildishtë dhe më shfrytezuan seksualisht, por tani policia po më ndihmon të kthehem në Nigeri”. Ky është rrëfimi i një vajze që u trafikua dhe u detyrua të punonte si punonjëse seksi, ndërsa The Guardian ka publikuar historinë e trishtë të saj.
“E lashë shkollën e mesme katër vjet më parë kur mbeta shtatzënë me vajzën time. Nuk kishte para për të rifilluar arsimin tim. Nëna ime e kishte lënë babanë tim poligam vite më parë, duke më lënë mua dhe motrën time binjake me të në shtëpinë tonë në Nigerinë qendrore. Fillova të punoja në një fshat tjetër në një pikë bastesh për një pagë mujore prej 10,000 naira. Por në gusht të këtij viti, pas një muaji, vendosa të kthehem në shtëpi. Udhëtimi im përfshinte kalimin nëpër qytetin e Makurdit ku fjeta gjatë natës në shtëpinë e një miku.
Unë isha 19 vjeçe. Atë mbrëmje, ishim jashtë kur një djalë na tha se e dashura e tij kishte një dyqan të ngjashëm në Bregun e Fildishtë dhe kishte nevojë për tre vajza shitëse. Ajo do të paguante një pagë mujore prej 50,000 CFA secila. E pyeta nëse ishte punë seksi, por ai e mohoi. Ai fliste ëmbëlsisht dhe u betua në emër të Zotit se ishte një punë e ligjshme. Motra ime binjake donte të vinte, por unë i thashë të më linte të shkoja e para. Ne strehuam së bashku në një dhomë hoteli përpara udhëtimit tim të nesërmen dhe duke qenë se ai nuk u përpoq të më prekte fare, mendova se ishte një njeri i mirë. Më dha një telefon dhe më bleu një biletë autobusi.
Udhëtimi nga Makurdi në Abidjan zgjati shtatë ditë dhe meqë nuk kisha asnjë dokument identifikimi, më thanë t’i tregoja emigracionit se do të shkoja të vizitoja motrën time. Në fund të gushtit, arrita në Yakassé në juglindje të Bregut të Fildishtë. Zonja që më priti, më çoi në një hotel. Ajo ishte një grua rreth të 30-ave, e cila kishte pseudonimin Blessing, si punëtore seksi dhe ajo më tha se imi do të ishte Destiny. Ajo më çoi në një geto, një vend i vogël me bordello dhe më tha menjëherë se i detyrohesha asaj për 1.5 milion CFA. Kur e pyeta se për çfarë ishin paratë, ajo nuk u përgjigj. Fillova të ndihesha keq.
Pas disa ditësh, ajo erdhi tek unë me një fletore të vogël në të cilën donte të bënte llogaritë, ndaj duhet t’i jepja të ardhurat e punës sime. Kur thashë se nuk kisha bërë asnjë punë, ajo më rrahu. Vazhdova të insistoja se nuk mund të bëja punë seksuale. Unë u sëmura pasi fillova punë, por ajo më detyroi të vazhdoj. Nuk e dija se çfarë ishte sëmundja dhe nuk kishte asnjë mënyrë për të marrë trajtim. Kur nuk punoja, ajo nuk më ushqente. Tarifat e mia ishin 2,000 CFA për një kohë të shkurtër ose 10,000 CFA për një natë.
Por nuk kishte klientë të mjaftueshëm sepse nuk ishte sezoni i korrjes së kakaos. Nga të ardhurat e mia, paguaja 4,000 CFA çdo dy ditë si qira për dhomën ku qëndroja. Shumë herët çdo ditë, zonja vinte për të mbledhur të ardhurat e mia dhe më jepte 1000 CFA prej saj si kompensim ditor për ushqimin tim. Ajo merrte para prej saj për ushqimin përpara se të paguante pjesën tjetër për borxhin tim, të cilin do ta shkruante në librin e saj. Djali i pronarit të hotelit tha se ishte i dashuruar me mua, edhe pse kishte një grua dhe dy fëmijë.
Para se të më ndihmonte të ikja, zonja ime më çoi në Abidjan dhe më shiti te shoqja e saj. Nuk e di sa kushtoi, por zonja më vuri një emër tjetër, Sweet. Unë isha ende me temperaturë, por ajo më detyroi të bëja seks me burra ose nuk do të haja. Pas tre ditësh, u futa në rutinë duke u ulur në lokal dhe duke qarë. Një burrë u përpoq të përfitonte nga unë, duke më çuar në shtëpinë e tij plot me djem të dehur dhe duke refuzuar të më paguante. Por unë e mposhta dhe përfunduam në komisariat. Policia punoi me ambasadën nigeriane për t’i bërë pritë zonjës dhe për ta arrestuar. Zonja filloi të më dërgonte mesazhe. Ajo tha se do të bënte rituale për të më çmendur sepse doja ta vë në telashe edhe pse më kishte ndihmuar. Tani po pres të kthehem në Nigeri dhe ndihem e lumtur. Mezi pres të jem në shtëpi”.
