Rreth 1.3 miliardë njerëz në botë vuajnë nga hipertensioni, një “vrasës” i heshtur që shpesh nxitet nga obeziteti dhe shton rreziqet e sëmundjeve të zemrës dhe veshkave. Pohimi vjen nga Organizata Botërore e Shëndetësisë që publikoi së fundmi një studim. Hipertensioni diagnostikohet lehtë duke monitoruar presionin e gjakut dhe trajtohet me ilaçe që kushtojnë lirë, por gjysma e të prekurve janë të pavetëdijshëm dhe mbesin pa kuruar.
E dimë që trajtimet dhe ilaçet janë të lira. Por duhet t’i fusim ato nën mbulimin e shëndetësisë universale, që të mos ketë kosto për asnjë pacient apo familjet e tyre.
Nivelet e hipertensionit kanë ndryshuar pak në 30 vite. Studimi i OBSH i kryer në bashkëpunim me revistën mjekësore “The Lancet”, thekson se numri më i madh i rasteve ka kaluar tek vendet e varfra pasi ato të pasura e kanë vendosur gjerësisht nën kontroll.
Rreth 18 milionë njerëz humbën jetën në 2019-ën nga sëmundjet kardiovaskulare, ku 1 në 3 prej tyre me hipertensionin si një faktor kryesor. OBSH thekson se përveç riskut të trashëguar për hipertension, ka dhe faktorë të tjerë që çojnë drejt kësaj sëmundjeje që lidhen me mënyrën e jetesës.
Obeziteti është një faktor risku. Ky është me të vërtetë një cunam i faktorëve ndikues dhe vendet anëtare janë në dijeni të plotë.
OBSH liston dietat e pashëndetshme, aktivitetet fizike, konsumin e alkoolit dhe duhanit, diabetin e pakontrolluar dhe mbipeshën si ndikuesit kryesorë që nxisin presionin e lartë të gjakut. Rikujtojmë, se Organizata Botërore e Shëndetësisë konstatoi se në muajt me masa kufizimi kundër koronavirusit fëmijët janë prekur më shumë nga obeziteti çka pritet të ndikojë te shëndeti i tyre në të ardhmen.
