Një studim i ri, rezultatet e të cilit u publikuan në “Journal of the American Heart Association”, tregon se të rriturit që preken nga herpes zoster kanë një shans prej 30% më të lartë për të pasur një atak në zemër ose për të zhvilluar sëmundje koronare të zemrës. Studimi zgjati deri në 16 vjet në Spitalin e Grave në Boston, gjatë të cilit ekspertët donin të vërtetonin një lidhje të përhershme midis herpesit dhe sëmundjeve të zemrës. Drejtuesja e studimit, Dr.Sharon E.Curhan, epidemiologe nga i njëjti spital tha se:
Edhe pse studimet e mëparshme kanë treguar se ekziston me të vërtetë një rrezik i shtuar i sëmundjeve të zemrës dhe sulmit në zemër në kohën e infeksionit me zoster, nuk dihej nëse ky rrezik mbetet i rritur pas shërimit të sëmundjes.
Herpes zoster është një nga gjithsej tetë lloje të ndryshme të herpesit. Në fakt, është një lloj virusi varicella-zoster që shkakton linë e dhenve me infeksionin e parë, të cilin shumica e njerëzve e kalojnë në fëmijëri. Megjithatë, ri-infeksioni me këtë virus mund të ndodhë më vonë në jetë. Kështu, herpes zoster shkaktohet nga riaktivizimi i virusit te njerëzit që kanë pasur linë e dhenve. Kjo më së shpeshti ndodh për shkak të dobësimit të imunitetit, rraskapitjes dhe stresit.
Sëmundja zakonisht fillon me një ndjenjë dobësie, me djegie dhe dhimbje në njërën anë të trupit dhe një temperaturë pak të ngritur. Disa njerëz gjithashtu kanë ethe, diarre ose vështirësi në urinim. Pas disa ditësh, në lëkurë shfaqen flluska dhe zona e prekur është shumë e ndjeshme. Flluskat janë të dhimbshme sepse herpes zoster prek disa nerva. Shpërthimi i flluskave është i lokalizuar në varësi të nervave të prekur. Më shpesh, flluskat shfaqen në njërën anë të fytyrës ose trupit dhe në zonën e qafës, por mund të shfaqen edhe diku tjetër.
Flluskat fillojnë të thahen rreth ditës së pestë pas shfaqjes së tyre. Pas një deri në dy javë, flluskat largohen dhe formohen krastat, por dhimbja mund të jetë ende e pranishme. Herpes zoster i patrajtuar mund të shkaktojë dëmtime të rënda nervore dhe infeksion dytësor bakterial. Herpes zoster trajtohet me barna antivirale dhe ndonjëherë me kortikosteroide. Për qetësimin dhe shërimin më të shpejtë të lëkurës rekomandohen edhe preparate natyrale.
