Ndoshta nuk ishin gjysmëfinalet më të pritura, të shumtë prisnin që Brazili dhe Portugalia të shkonin më tej. Por, kështu është një Botëror, ndaj të tilla befasi e bëjnë më magjepsës. Ekipet e preferuara që shkojnë në shtëpi, zgjedhje absolutisht të papritura e që lënë pas ndodhi të paharrueshme… Tashmë, Katar 2022 e ka bërë historinë e futbollit dhe ende mund të vazhdojë të rezervojë surpriza.
Argjentinë-Kroaci që luhet të martën më 13 dhjetor tërheq shumë interes. Për Argjentinën spikat organizimi i lojës së hekurt, bazuar në lëvizjet e Messit. Leo mund të bëjë si të dëshirojë me shokët që e ndjekin. Numri dhjetë më i rëndësishëm në botë ka mundësinë unike (dhe të fundit) për të fituar një Kupë Bote e kështu t’i bashkohet Mbretit Diego në Perandorinë e futbollit botëror.
Po kroatët? Ballkanasit ëndërrojnë një goditje në finale, çka do të ishte arritje unike dhe e jashtëzakonshme. Një vend me 4 milion banorë e që në 30 vite, tashmë ka arritur në tre gjysmëfinale botërore në 30 vite. Daliç dhe të vetët duan të hedhin një hap më tej e të ngjiten në shkallën më të lartë të podiumit.
Cilësia teknike individuale dhe një organizim i mirë përbëjnë bazën, por më efektive janë armët që do të përdoren për ta bërë ëndrrën realitet. Për pjesën tjetër është Modriç…
Francë-Marok, gjysmëfinalja që nuk e pret, por që ka kuptime të cilat shkojnë përtej botës së futbollit. Përzgjedhja e Regraguit tashmë ka hyrë në histori, duke e bërë Marokun të parën skuadër afrikane në mesin e katër më të mirëve në botë. Një ekip me afrikanë, shumica e të cilëve luajnë në kampionatet më të rëndësishme europiane.
Ata nuk kanë gjë për të humbur e të ëndërrosh nuk kushton asgjë, veçanërisht kur ke pas brohoritjen dhe mbështetjen e një kontinenti të tërë e një pjese të madhe të botës arabe.
Franca ka mundësinë e artë dhe trajneri Deschamps mund ta ngrejë për dy edicione radhazi kupën, një tjetër shans për të shkruar historinë. Nuk ka dyshim se sa i përket skuadrës, alternativave, lojës së testuar dhe cilësive teknike individuale, Franca është më e favorizuara. Por, “Katar 2022” e ka bërë të qartë se asgjë nuk mund të merret si e mirëqenë. Tani, t’i shijojmë këto gjysmëfinale. Gjithçka përfundon brenda një jave, më 18 dhjetor.
