Organizata evropiane jofitimprurëse për mbrojtjen e privatësisë NOYB me seli në Vjenë, paraqiti një ankesë kundër Mozilla-s në Agjencinë austriake për Mbrojtjen e të Dhënave. Kompania thuhet se po përdor veçorinë e privatësisë së Firefox-it, të aktivizuar pa kërkuar pëlqim, për të gjurmuar sjelljen e përdoruesve në internet. Bëhet fjalë për funksionin “Privacy-Preserving Attribution”, i cili është zhvilluar në bashkëpunim me Meta, kompaninë zotëruese të Facebook, Instagram dhe WhatsApp.
Ai u aktivizua automatikisht si një veçori eksperimentale në versionin 128 të Firefox-it, i cili u lëshua në korrik të këtij viti. Sipas NOYB, Mozilla e përdor këtë veçori për të gjurmuar sjelljen e përdoruesve të Firefox-it në faqet e internetit. “Ndryshe nga emri i saj qetësues, kjo teknologji lejon Firefox-in të gjurmojë sjelljen e përdoruesve nëpër faqet e internetit. Në thelb, shfletuesi tani kontrollon gjurmimin në vend të faqeve të internetit individuale”-thuhet në ankesën e NOYB.
“Ndërsa ky mund të jetë një përmirësim mbi gjurmimin më invaziv të cookie-ve, kompania nuk i pyeti kurrë përdoruesit e saj nëse dëshironin ta aktivizonin atë. Në vend të kësaj, Mozilla zgjodhi ta aktivizonte si parazgjedhje kur njerëzit instaluan një përditësim të fundit të softuerit”-u tha ndër tjera. Sipas NOYB, PPA lejon Firefox-in të ruajë të dhëna në lidhje me ndërveprimet e përdoruesve me reklamat dhe t’i grumbullojë ato informacione për reklamuesit.
Mozilla pretendon se ky sistem përmirëson privatësinë duke matur performancën e reklamave pa mbledhur të dhëna për përdoruesit individualë. Megjithatë, NOYB thotë se disa nga gjurmimet bëhen në Firefox, gjë që shkel të drejtat e përdoruesve të shfletuesit të garantuara nga Rregullorja e Përgjithshme e BE-së për Mbrojtjen e të Dhënave. “Mozilla sapo ka pranuar narrativën se industria e reklamave ka të drejtën të gjurmojë përdoruesit duke e kthyer Firefox-in në një mjet për të matur performancën e reklamave”-tha NOYB. “Ndërsa Mozilla mund të ketë pasur qëllime të mira, APP-ja nuk ka gjasa të zëvendësojë cookie-t dhe mjete të tjera gjurmimi. Është thjesht një mjet i ri, shtesë për të gjurmuar përdoruesit”-u tha në fund.
