Manastiri i Shën Julitës dhe Qiriakut në Dhuvjan të Gjirokastrës, së shpejti do t’i nënshtrohet restaurimit. Projekti do të financohet nga Departamenti Amerikan i Shtetit, DASH, si dhe nga Fondi i Ambasadorëve për Ruajtjen e Trashëgimisë Kulturore në Shtetet e Bashkuara të Amerikës e po ashtu nga Ambasada e Uashingtonit në Tiranë, përmes CHwB Albania.
Organizata CHwB Albania (Trashëgimia Kulturore pa Kufij) dha njoftimin për pjesëmarrje në tender: Ndërhyrje Konservuese në “Manastirin e Shën Julitës dhe Qiriakut”, (Monument i Kategorisë së Parë).
Trashëgimia Kulturore pa Kufij fton kompani që janë të licencuara në zbatimin e punëve restauruese në fushën e trashëgimisë kulturore, të dorëzojnë oferta financiare, të vlefshme për punë në një objekt kulti, Monument i Kategorisë së Parë, për projektin: “Ndërhyrje Konservuese në “Manastirin e Shën Julitës dhe Qiriakut”, në Dhuvjan, në Gjirokastër”.
Manastiri është një mrekulli arkitekturore e Mesjetës, ndërtuar në vitin 1588. Vlerësohet gjerësisht se kjo perlë e rrallë shfaq zgjuarsinë e ndërtuesve mesjetarë, me nefin e saj në formë kryqi, të kurorëzuar nga një kube madhështore.
Gjashtë kolona tërheqin sytë nga kupola mbresëlënëse, një dëshmi e aftësisë së epokës në krijimin e strukturave të forta, por njëherazi elegante. Jashtë, kisha magjeps me përmasat e saj harmonike, si dhe me arkitekturën e detajuar me përpikëri duke ofruar një vështrim nga e kaluara.
Me historinë e saj të pasur, si dhe me arkitekturën e jashtëzakonshme, Kisha e Shën Julitës e Qiriakut në Dhuvjan nuk është thjesht një vend adhurimi, por një thesar i së kaluarës mesjetare të Shqipërisë. Konsiderohet një ndalesë e paharrueshme për adhuruesit e historisë e të apasionuarit e arkitekturës.
