Franca ka nisur një iniciativë për të ulur përdorimin e plastikës, dhe një projektligj i ri synon të ndalojë shishet e vogla plastike të ujit. Politiani Pierre Cazeneuve, pjesë e partisë së Presidentit Emmanuel Macron, e ka cilësuar këtë formë plastike si “absurde” dhe “marrëzi mjedisore”.
Projektligji i propozuar, që mund të eliminojë shishet më të vogla se 50 cl, nënkupton se shishet me kapacitet 33, 25 dhe 17 cl, që përmbajnë 20-25 gram plastikë për disa gllënjka ujë, do të ndalohen. Sidoqoftë, shishet e mëdha do të përjashtohen nga ky ndalim.
Për të bërë ligjin realitet, ai duhet të kalojë disa etapa legjislative dhe të marrë mbështetje nga shumica e deputetëve në parlament. Megjithatë, përbërja aktuale e qeverisë është e ndarë, duke e bërë kalimin e ligjit të vështirë. Sidoqoftë, një sondazh nga ‘OpinionWay’ tregon se rreth dy të tretat e qytetarëve e mbështesin ndalimin.
Aktualisht, në Francë prodhohen mbi 13 miliardë shishe plastike çdo vit, dhe shumë prej tyre nuk riciklohen, duke përfunduar në oqeane dhe duke shkaktuar dëme mjedisore. Ndërsa legjislacioni aktual i Francës ka ndaluar gradualisht përdorimin e plastikës njëpërdorimshe, shishet e ujit nuk janë përfshirë.
Për të promovuar praktikën e mbushjes së shisheve të rimbushshme, shumë qytete franceze ofrojnë burime të ujit të pijshëm, duke inkurajuar kështu një mënyrë më të qëndrueshme të konsumit.
