Një raport i ri i FBI-së ka zbuluar disa detaje të tjera nga vdekja e kineastes Halyna Hutchins në sheshxhirim. Sipas raportit aktori i njohur Alec Baldwin tërhoqi këmbëzën e armës që vrau kineasten në setin e filmit “Rust”. Aktori më parë e ka mohuar këtë gjë, mirëpo raporti ka hedhur poshtë deklaratën e tij. Ngjarja e rëndë ndodhi në tetor të vitit që shkoi. Mjekësia ligjore ka raportuar se arma nuk mund të shkrepej kurrsesi nëse këmbëza nuk do të tërhiqej. Ndërkaq, raporti pohon se:
Rishikimi i raporteve të disponueshme të zbatimit të ligjit nuk tregoi asnjë demonstrim bindës se arma e zjarrit ishte e ngarkuar qëllimisht me municion të vërtetë. Bazuar në të gjitha informacionet e disponueshme, duke përfshirë mungesën e qëllimit të dukshëm për të shkaktuar dëm ose vdekje, mënyra e vdekjes klasifikohet më së miri si aksident.
Ndërkaq, Zyra e Sherifit të Qarkut Santa Fe njoftoi së fundmi se hetimet për vrasjen e kineastes Halyna Hutchins janë drejt fundit. Hetuesit thonë se ata po presin për të dhënat telefonike të Baldwin, të cilat Departamenti i Policisë së Qarkut Suffolk po ndihmon autoritetet e New Mexico për t’i marrë.
Kanë kaluar gati nëntë muaj që kur Baldwin qëlloi për vdekje kineasten Halyna Hutchins me një armë që duhej të përdorej në film. Ata ishin pjesë e një ekipi që filmonte “Rust” në periferi të Santa Fe. Që atëherë, Byroja e Shëndetit dhe Sigurisë në Punë të New Mexico gjobiti kompaninë e prodhimit të filmit për dështime në sigurinë e armëve të zjarrit. Familja e Hutchins ka paditur gjithashtu Baldwin dhe producentët e filmit.
