Në “Red Bull Arena” të Leipzigut, Kroacia dhe Italia do të luajnë ndeshjen e fundit të fazës së grupeve, me objektivin për të marrë një biletë për në raundin tjetër. Me Spanjën e kualifikuar në Grupin B, të gjitha ekipet e tjera janë në garë për të avancuar më tej. Pasi mundën Shqipërinë me përmbysje, italianët nuk e përballuan ritmin e spanjollëve duke u mundur minimalisht.
Me tri pikë e të avantazhuar përballë kuqezinjve, një barazim do t’i mjaftonte skuadrës së Spalletti-t për të kaluar në raundin tjetër, pasi dhe me katër pikë do të siguronte vendin e dytë, pavarësisht se çfarë ndodh në takimin tjetër të grupit. Barazimi do e kthente në një mision tjetër të vështirë misionin për Kroacinë, që edhe nëse del e treta duket e vështirë që të jetë një mes katër më të mirave të kësaj pozite.
Te Kroacia e dinë mirë se vetëm firoja u jep shpresë se mund të kalojnë më tej. Megjithatë, për të siguruar vendin e dytë me 4 pikë, fitorja e tyre duhet kombinuar me një humbje të Shqipërisë. Në rast se Shqipëria fiton minimalisht, atëherë kroatët duhet të fitojnë me një diferencë minimalisht prej 3 golash përballë italianëve.
Kroacia ka treguar se di të reagojë më mirë ndaj skuadrave që konsiderohen më favorite. Ndaj Shqipërisë, të besuarit e Daliç treguan shumë probleme dhe pritet që të ketë ndryshime për takimin e kthimit. Italia mban statusin si kampionia në fuqi e europianit, por nëse mundet nga Kroacia dhe Shqipëria fiton ndaj Spanjës, rrezikon që të dalë dhe e fundit.
Kjo është hera e tretë që Kroacia dhe Italia përballen në fazën finale të një kompeticioni madhor. Në vitin 2002, në Kupën e Botës, Kroacia fitonte 2-0, ndërsa në “Euro 2012”, dy skuadrat u ndanë në një barazim 1-1. Që nga viti 1990, Kroacia është e pamposhtur në 8 takimet e zhvilluar përballë italianëve, teksa kanë fituar tre e kanë mundur të barazojnë pesë. Tre ndeshjet e fundit mes këtyre dy ekipeve kanë përfunduar në barazim 1-1.
