Miliarderi i teknologjisë, Elon Musk po planifikon të ndërtojë një universitet në Austin të Teksasit, sipas dosjeve tatimore, raporton Bloomberg. Një organizatë bamirëse e quajtur The Foundation mori një donacion nga Musk prej 100 milionë dollarësh dhe me këto para planifikon fillimisht të hap një shkollë fillore dhe të mesme në Austin për shkencë, teknologji, inxhinieri dhe matematikë.
Pasi të bëhet plotësisht funksionale, shkolla do të fokusohet në krijimin e një universiteti. Kjo shkollë po synon të kërkojë akreditim nga Shoqata Jugore e Kolegjeve dhe Komisioni i Shkollave për Kolegjet, një hap i parë i domosdoshëm për të hapur institucionin arsimor. Sipas dosjes, universiteti planifikon t’i mësojë studentët brenda institucionit gjithashtu edhe nga distanca, me teknologji të përshtatshme.
Në fillim do të regjistrojë 50 studentë për ta rritur këtë numër me kalimin e kohës. Shkolla do të financonte aktivitetet e saj përmes donacioneve dhe tarifave të shkollimit, megjithëse në dosje thuhet gjithashtu se nëse një student nuk mund të paguajë shkollimin ose tarifat, shkolla mund të sigurojë ndihmë financiare. Institucioni që po përpiqet të hap Elon Musk ka nisur aktualisht rekrutimin e stafit.
Rikujtojmë se së fundmi Musk zbuloi në një intervistë të re se ai kishte kaluar një krizë ekzistenciale në moshën 12-vjeçare, në të cilën ai mendoi t’i jepte fund jetës së tij. 52-vjeçari i tha Aaron Ross Sorkin të ‘New York Times’ në Samitin e ‘DealBook 2023’ se ai dikur mendonte: “A është e gjitha e kotë? Pse të mos bëj vetëvrasje? Pse ekzistoj?’”
Musk tha se në atë kohë, ai do të lexonte tekste fetare dhe në veçanti, libra të filozofisë gjermane që e bënin atë mjaft të dëshpëruar, kështu që ai këshilloi që adoleshentët të mos i lexonin ato. Sidoqoftë, kur mori në dorë “Udhëzuesin e autostopit për galaktikën” të Douglas Adams, ai kuptoi se gjetja e kuptimit të jetës nuk zvogëlohet në një përgjigje të thjeshtë, por më tepër se cilat pyetje duhet të bëjmë.
