Trajneri i Kosovës, Franko Foda, beson se skuadra e tij është në rrugën e duhur.
Pas fitores me Lituaninë në “Fadil Vokrri”, trajneri gjerman theksoi: “Në pjesën e parë ishim më konstantë, luajtëm më mirë dhe shënuam gol. Pas kartonit të kuq ishim të detyruar të vrapojmë më shumë në lojën pa top.
Edhe në pjesën e dytë i kishim dy raste për të shënuar golin e dytë. Prej minutës së 65-të kishim edhe pak fat, me shtyllat që i goditi Lituania. U detyruam të ndërrojmë edhe skemën, luajtëm me 5-3-1.
LEXO EDHE: Muriqi: “U prekëm emocionalisht, në Rumani kemi marrë vendimin e duhur”
Jam shumë krenar me ekipin dhe shumë i lumtur që kemi fituar. Nga Rumania u kthyem në 4 të mëngjesit dhe nuk kishim shumë kohë. Kishim edhe probleme në mbrojtje. Kishim përkrahje të mahnitshme nga tifozët dhe i falënderoj ata. Jemi shumë të lumtur me rezultatet e fundit. Në 5 ndeshje kemi 4 fitore dhe një barazim, jemi në rrugën e duhur”.
Muharrem Jashari, autori i golit të fitores ndaj Lituanisë, pas ndeshjes u shpreh: “Emocion i papërshkrueshëm. Më shumë jam i lumtur për fitoren se për golin. I falënderoj jashtëzakonisht lojtarët që u angazhuan në pjesën e dytë, kishin barrë shtesë, pasi ishin me një lojtar më pak.
I kuqi? “Ndoshta kam menduar se nuk është as karton i verdhë. E kam prekur pak në këmbë, por për mua nuk ishte i kuq. Kemi luajtur shumë mirë taktikisht, pasi e kishim analizuar kundërshtarin.
LEXO EDHE: Shqipëri-Ukrainë, kuqezinjtë në kërkim të fitores së parë në shtëpi!
Nuk është pozita ime e zakonshme kjo në krahun e majtë, por kam luajtur edhe më parë. E falënderoj trajnerin për besimin. Jam shumë i lumtur me gjithë lojtarët dhe stafin. Golin ia dedikoj familjes sime”.
