Zënkat, pavarësisht se me kë ndodhin, shpesh lënë pas ndjenja të këqija që mund të zgjasin për ditë të tëra. Edhe kur e dimë se një konflikt do të na mërzitë, shpesh ndodhemi të përfshirë në të. Një studim i publikuar nga *Business Insider* ka analizuar faktorët që na shtyjnë drejt përfshirjes në zënka, duke ofruar disa përgjigje të reja nga psikologjia mbi arsyet që shkaktojnë këto konfrontime.
Një nga faktorët kryesorë është pushteti pa respekt. Në vendet e punës, ata që kanë shumë pushtet, por janë në një status të ulët social, shpesh kanë tendencën të përfshihen në konflikte të shumta. Një “cikël vicioz” me fyerje dhe komente negative mund të lindë lehtësisht në këto kushte.
Një shkaktar tjetër i konfliktit është mungesa e gjumit. Studimet kanë zbuluar se kur një person nuk është i mjaftueshëm i pushuar, kjo ndikon negativisht në aftësinë për të menaxhuar stresin dhe mund të shkaktojë zënka, veçanërisht në marrëdhëniet intime.
Një faktor tjetër është racionaliteti i tepërt. Edhe pse njerëzit shpesh thonë se duhet të jenë më racionalë gjatë një debati, studimet sugjerojnë se kjo mund të çojë në më shumë konflikte, pasi racionaliteti shpesh ndikon që një person të mos marrë parasysh këndvështrimin e tjetrit dhe ta përdorë mendimin si një “armë” për të fituar diskutimin.
Një tjetër arsye është vetë-përfshirja. Njerëzit që e shohin veten dhe të tjerët si njësi të pandashme janë më të prirur të arrijnë në kompromis dhe të ndihen më mirë pas një konflikti. Në kontrast, ata që e shohin veten si individ të veçantë kanë më shumë mundësi të ndihen keq pas një konfrontimi.
Empatia dhe vetë-dhembshuria luajnë gjithashtu një rol të rëndësishëm. Njerëzit që kanë një nivel të ulët vetë-dhembshurie kanë tendencën të bëjnë kompromise të shpejta, shpesh në dëm të nevojave të tyre, ndërsa ata me vetë-dhembshuri të lartë arrijnë kompromise më të qëndrueshme dhe më të balancuara.
Së fundmi, një arsye që ndikon në shpërthimet e konflikteve është mungesa e autenticitetit. Studimet tregojnë se ata që veprojnë në mënyrë autentike dhe nuk fshehin ndjenjat e tyre janë më të mbrojtur ndaj emocioneve negative pas një zënke. Ata mund të mbyllin një konflikt pa u ndjerë keq, ndërsa ata që nuk janë të vërtetë me veten kanë më shumë mundësi të ndihen të dëmtuar pas një konfrontimi.
Këto gjetje sugjerojnë se për të menaxhuar më mirë konfliktet dhe për të shmangur ndikimet negative, është e rëndësishme të ruajmë ekuilibrin emocional, të jemi të kujdesshëm për gjumin dhe të veprojmë me autenticitet dhe empati.
