Në ditët e para të pushtimit rus të Ukrainës, Adam Oake, një kanadez pa trajnim paraprak ushtarak, shiti të gjitha aksionet që kishte në “Toronto Maple Leafs” për të blerë një biletë avioni. Duke folur për CTV National News nga një vendndodhje sekrete stërvitore ushtarake në Ukrainën perëndimore, Oake kujtoi se kishte parë lajmet e pushtimit të Rusisë në shkurt 2022 dhe u ndje i detyruar të përfshihej. “Duke parë se sa njerëz të pafajshëm po vriteshin, nuk mund të qëndroja në shtëpi duke e ditur se mund të bëja diçka për të ndihmuar”-tha Oake.
Dy muaj më parë, ai iu bashkua Brigadës së 25-të Ajrore të Ukrainës. Në javët e ardhshme, ai do të vendoset në betejë për herë të parë si operator dronesh. 34-vjeçari me origjinë nga Toronto foli për herë të parë për CTV News në verën e vitit 2022, ndërsa ishte në Ukrainë, teksa shërbente si vullnetar i ndihmës me një OJQ ndërkombëtare. Ai foli përsëri me CTV News kur u kthye në Kanada në janar të vitit 2023, ndërsa u përpoq të rikuperohej nga trauma që kishte pësuar, ndërsa shpërndante ushqim dhe ilaçe në vijat e para.
Tani, më shumë se një vit e gjysmë më vonë, Oake thotë se është i gatshëm të sakrifikojë jetën e tij në një përpjekje për të ndihmuar Ukrainën të fitojë atë që tani është kthyer në një luftë rrënimi. “E kam pranuar plotësisht mundësinë që me shumë mundësi të plagosem, por edhe unë mund të vritem. Ekziston edhe kjo mundësi”-tha ai. Shërbimi Federal i Sigurisë së Rusisë (FSS) publikoi video rrëqethëse që tregon trupat e katër burrave për të cilët pretendon se janë luftëtarë të huaj. Videoja tregon gjithashtu flamuj kanadezë pranë trupave. Së fundmi, Global Affairs Canada konfirmoi se një kanadez u vra në Rusi. Gjeneralmajori në pension David Fraser thotë se sa më gjatë të vazhdojë lufta, aq më e zymtë po bëhet situata për Ukrainën.
“Presidenti Zelinsky do të marrë këdo që është i përgatitur të luftojë për Ukrainën. Nuk ka rëndësi, ai ka mungesë ushtarësh. Ata kanë luftuar për disa vjet, shumica e ushtarëve që filluan të luftojnë ka shumë të ngjarë të jenë plagosur ose vrarë dhe Rusia vazhdon të vendosë gjithnjë e më shumë ushtarë, kjo është një situatë e tmerrshme për Ukrainën”-thotë Fraser. Adam Oake nuk është ukrainas dhe ai e pranon hapur se nuk ka përvojë të mëparshme luftarake. Ai u regjistrua në ushtrinë ukrainase në shtator, ku po stërvitet së bashku me shumë kanadezë të tjerë, të cilët të gjithë po përgatiten të vendosen në javët e ardhshme.
I pyetur nëse mendon se 3 ose 4 muaj stërvitje ushtarake do ta përgatisin në mënyrë adekuate për luftën në të cilën do të hyjë, kanadezi shprehet: “Absolutisht, trajnimi këtu ka qenë fantastik”. Ai thotë se stërvitja fizike ka qenë solide, së bashku me stërvitjen e mbijetesës. Megjithëse realiteti, sipas gjeneralmajorit në pension David Fraser, është se Oake dhe operatorët e tjerë të dronëve janë në rrezik të konsiderueshëm në fushën e betejës, pasi ata janë bërë gjithnjë e më shumë një objektiv me prioritet të lartë.
