Media dhe analistët amerikanë janë pothuajse dakord që në duelin e parë presidencial televiziv, Joe Biden nuk ia doli. Presidenti i SHBA-ve u paraqit me një zë të dobët e të ngjirur (për shkak të një të ftohure, ai e shpjegoi me vonesë fushatën e tij në mes të debatit), belbëzoi më shpesh se zakonisht, tha fjali të ngatërruara ose të përsëritura mekanikisht e ngulte sytë në hapësirë. Aq sa mes demokratëve tashmë ka panik të fortë për performancën që rrezikon ta fundosë në votime.
Madje, dikush komentoi se presidenti duhej të largohej, raporton CNN, organizatori i përballjes. Gjithashtu në pikëpyetje është dhe fushata e presidentit, e cila insistoi në sfidën dhe e përgatiti atë për një javë në Camp David.
Në anën tjetër, Donald Trump dukej si një luan plot energji, i aftë për të kontrolluar agresivitetin e tij të zakonshëm, edhe nëse u driblonte shumë pyetjeve e përsëriste ato që u cilësuan “gënjeshtra të ndryshme”. Por, ajo që kishte më shumë rëndësi në sfidën mes dy kandidatëve më të vjetër ishte testi i moshës, pra mbi kthjelltësinë dhe pamjen fizike.
Biden dhe Trump shkuan pasdite në Atlanta. I pari me gruan Jill, i dyti vetëm, pa Melanian dhe asnjë familjar. Në studion e CNN-it, të dy nuk i shtrënguan duart dhe as nuk u panë me njëri-tjetrin gjatë dy pauzave me reklama, një konfirmim i distancës së ashpër që i ndan dhe i polarizimit të një vendi që nuk e njeh më kundërshtarin e tij.
Po të kemi parasysh edhe nivelin e ulët të diskutimit, e gjithë Amerika del keq. Biden filloi keq menjëherë, duke rikuperuar vetëm pak energji në pjesën e dytë, kur ishte tepër vonë. Të dy u përplasën ashpër për gjithçka, duke akuzuar njëri-tjetrin për gënjeshtra, nga ekonomia te emigracioni, nga klima te aborti, në një format fiks të kohës që tregonte të gjitha kufijtë.
Manjati goditi inflacionin “që po vret vendin tonë” dhe dyert e hapura në kufirin me Meksikën ku hyjnë “kriminelët dhe terroristët”. Biden u mburr me sukseset e tij pas “kaosit” të lënë nga paraardhësi, duke e akuzuar se favorizonte të pasurit me uljen e taksave duke rritur defiçitin.
Të kundërt edhe në politikën e jashtme
Manjati përsëriti se lufta në Ukrainë nuk do të kishte shpërthyer nëse Amerika do të kishte një udhëheqës të vërtetë, por ai nuk dha recetën e tij për paqen. Ndërkaq, anashkaloi pyetjen nëse ai është për një shtet palestinez. Ndërkaq, u kufizua duke thënë se Izraeli “duhet të përfundojë punën e tij me Hamasin” dhe se Biden “është bërë një palestinez që nuk e duan as palestinezët, sepse ai është i dobët”.
Nuk munguan ofendimet personale
“Ti je një humbës dhe një idiot”, sulmoi Biden, i cili më pas e quajti rivalin e tij një “kriminel të dënuar”, duke e akuzuar për tradhtinë e gruas së tij shtatzënë me një yll të filmave porno. Trump nuk vonoi dhe i tha se djali Hunter është gjithashtu një kriminel i dënuar e kërcënoi se edhe ai mund të dënohej sapo të largohej nga detyra “për të gjitha gjërat e tmerrshme që ka bërë”.
Donald Trump u mburr me formën e tij të shkëlqyer dhe sfidoi rivalin që të bënte një test njohës, duke thënë se ishte i sigurt se nuk do t’i përfundonte pyetjet e para, ndërsa presidenti hodhi poshtë pyetjen për 86 vitet që do të ishte në fund të mandatit të tij të dytë.
Në fund, manjati, i akuzuar nga Biden se kishte nxitur sulmin në Capitol, përcaktoi “çdo formë dhune në zgjedhjet e ardhshme si krejtësisht të papranueshme, por ai u zotua të njohë rezultatin vetëm nëse kushtet që janë “të lira, të drejta dhe ligjore”.
