Donald Trump mbajti tubimin në Miçigan, një nga shtetet që pritet të jenë vendimtare për të përcaktuar fatin e zgjedhjeve të nëntorit, së bashku me kandidatin e tij të sapo emëruar për postin e zv.presidentit. Ky ishte tubimi i parë i fushatës që kur ai i mbijetoi një atentati.
Ishte saktësisht një javë më parë, madje në këtë orë, madje edhe në këtë minutë, tha Trump duke kujtuar të shtënat e 13 korrikut në Pensilvani që e lanë atë me një vesh të gjakosur, vranë një nga mbështetësit e tij dhe dy të tjerë u plagosën.
Unë qëndroj para jush vetëm me hirin e Zotit të plotfuqishëm. Unë mund të mos isha këtu tani.
Ish-presidenti Trump ishte me senatorin e Ohajos J.D. Vance, në paraqitjen e parë së bashku që kur ata morën emërimin në Kuvendin Kombëtar Republikan në Miluoki. Miçigani është një nga shtetet që pritet të përcaktojnë rezultatin e zgjedhjeve presidenciale të nëntorit. Trump fitoi me një diferencë prej vetëm mbi 10 mijë votash në Miçigan në vitin 2016, por demokrati Joe Biden fitoi në këtë shtet në vitin 2020, me një diferencë prej 154,000 votash.
Vendimi i Trump-it për të emëruar senatorin Vance u pa si një përpjekje për të rritur mbështetjen mes votuesve në shtetet si Miçigani, Pensilvania, Uiskonsini dhe Ohajo, që e ndihmuan atë të siguronte fitoren në vitin 2016.
Senatori Vance i veçoi këto shtete në fjalimin e tij në Kuvendin Republikan, duke e vënë theksin tek fëmijëria e tij e varfër në një qytet të vogël të Ohajos dhe duke u zotuar se nuk do t’i harrojë pjesëtarët e klasës punëtore, mes së cilëve është rritur, “vendet e punës të të cilëve u zhvendosën jashtë vendit dhe fëmijët e të cilëve u dërguan në luftëra”.
Pasi u shfaq i “përulur” dhe emocional gjatë Kuvendit Republikan, Trump iu kthye mënyrës së tij të zakonshme të të bërit fushatë, duke fyer rivalët e tij demokratë, duke përsëritur të pavërtetat për zgjedhjet e vitit 2020 dhe duke e mbushur me shaka fjalimin e tij, që shkaktoi të qeshurat e një audience entuziaste.
Ai foli gjithashtu për të shtënat, duke treguar se si e kishte kthyer kokën për të parë një tabelë mbi kalimet e paligjshme në kufirin jugor të vendit të shfaqura në një ekran gjigant, duke shmangur kësisoj plumbin që goditi veshin e tij.
Ia kam borxh jetën time emigracionit.